حسن کو وسعتیں جو دیں عشق کو حوصلہ دیا

حسن کو وسعتیں جو دیں عشق کو حوصلہ دیا

جو نہ ملے نہ مٹ سکے وہ مجھے مدعا دیا

ہاتھ میں لے کے جام مے آج وہ مسکرا دیا

عقل کو سرد کر دیا روح کو جگمگا دیا

دل پہ لیا ہے داغ عشق کھو کے بہار زندگی

اک گل تر کے واسطے میں نے چمن لٹا دیا

لذت درد خستگی دولت دامن تہی

توڑ کے سارے حوصلے اب مجھے یہ صلا دیا

کچھ تو کہو یہ کیا ہوا تم بھی تھے ساتھ ساتھ کیا

غم میں یہ کیوں سرور تھا درد نے کیوں مزا دیا

اب نہ یہ میری ذات ہے اب نہ یہ کائنات ہے

میں نے نوائے عشق کو ساز سے یوں ملا دیا

عکس جمال یار کا آئنۂ خودی میں ہے

یہ غم ہجر کیا دیا مجھ سے مجھے چھپا دیا

حشر میں آفتاب حشر اور وہ شور الاماں

اصغرؔ بت پرست نے زلف کا واسطا دیا

husn ko wusaten jo den ishq ko hausla diya

jo na mile na mit sake wo mujhe muddaa diya

hath mein le ke jam-e-mai aj wo muskura diya

aql ko sard kar diya ruh ko jagmaga diya

dil pe liya hai dagh-e-ishq kho ke bahar-e-zindagi

ik gul-e-tar ke waste main ne chaman luta diya

lazzat-e-dard khastagi daulat daman tahi

tor ke sare hausle ab mujhe ye sala diya

kuchh to kaho ye kya hua tum bhi the sath sath kya

gham mein ye kyun surur tha dard ne kyun maza diya

ab na ye meri zat hai ab na ye kainat hai

main ne nawa-e-ishq ko saz se yun mila diya

aks-e-jamal-e-yar ka aina-e-khudi mein hai

ye gham-e-hijr kya diya mujh se mujhe chhupa diya

hashr mein aftab-e-hashr aur wo shor-e-alaman

asghar-e-but parast ne zulf ka wasta diya