جشن عید

سبھی نے عید منائی مرے گلستاں میں

کسی نے پھول پروئے کسی نے خار چنے

بنام اذن تکلم بنام جبر سکوت

کسی نے ہونٹ چبائے کسی نے گیت بنے

بڑے غضب کا گلستاں میں جشن عید ہوا

کہیں تو بجلیاں کوندیں کہیں چنار جلے

کہیں کہیں کوئی فانوس بھی نظر آیا

بطور خاص مگر قلب داغ دار جلے

عجب تھی عید خمستاں عجب تھا رنگ نشاط

کسی نے بادہ و ساغر کسی نے اشک پئے

کسی نے اطلس و کمخواب کی قبا پہنی

کسی نے چاک گریباں کسی نے زخم سیے

ہمارے ذوق نظارہ کو عید دن بھی

کہیں پہ سایۂ ظلمت کہیں پہ نور ملا

کسی نے دیدہ و دل کے کنول کھلے پائے

کسی کو ساغر احساس چکنا چور ملا

بہ فیض عید بھی پیدا ہوئی نہ یک رنگی

کوئی ملول کوئی غم سے بے نیاز رہا

بڑا غضب ہے خدا وند کوثر و تسنیم

کہ روز عید بھی طبقوں کا امتیاز رہا

sabhi ne eid manai mire gulistan mein

kisi ne phul piroe kisi ne khar chune

banam izn-e-takallum banam jabr-e-sukut

kisi ne hont chabae kisi ne git bane

bare ghazab ka gulistan mein jashn-e-eid hua

kahin to bijliyan kaunden kahin chanar jale

kahin kahin koi fanus bhi nazar aya

bataur-e-khas magar qalb-e-dagh dar jale

ajab thi eid khumistan ajab tha rang-e-nishat

kisi ne bada-o-saghar kisi ne ashk piye

kisi ne atlas-o-kamkhwab ki qaba pahni

kisi ne chak-e-gareban kisi ne zakhm saye

hamare zauq-e-nazara ko eid din bhi

kahin pe saya-e-zulmat kahin pe nur mila

kisi ne dida-o-dil ke kanwal khule pae

kisi ko saghar ehsas chukna chur mila

ba faiz-e-eid bhi paida hui na yak rangi

koi malul koi gham se be niyaz raha

bara ghazab hai khuda wanad-e-kausar-o-tasnim

ke roz-e-eid bhi tabqon ka imtiyaz raha