جلوہ فرما دیر تک دل بر رہا

جلوہ فرما دیر تک دل بر رہا

اپنی کہہ لی سب نے میں ششدر رہا

جسم بے حس بے شکن بستر رہا

میں نئے انداز سے مضطر رہا

میں خراب بادہ و ساغر رہا

دل فدائے ساقیٔ کوثر رہا

میں رہا تو باغ ہستی میں مگر

بے نوا بے آشیاں بے پر رہا

سب چمن والوں نے تو لوٹی بہار

اور مجھے صیاد ہی کا ڈر رہا

کوئی سمجھا رند کوئی متقی

لب پہ توبہ ہاتھ میں ساغر رہا

تھم رہے آنسو رہی دل میں جلن

نم رہیں آنکھیں کلیجہ تر رہا

عمر بھر پھرتا رہا میں در بدر

مر کے بھی چرچا مرا گھر گھر رہا

سیکڑوں فکریں ہیں تم کو عاقلو

تم سے تو مجذوبؔ ہی بہتر رہا

jalwa farma der tak dil bar raha

apni kah li sab ne main shashdar raha

jism-e-be his be shikan bistar raha

main nae andaz se muztar raha

main kharab-e-bada-o-saghar raha

dil fida-e-saqi-e-kausar raha

main raha to bagh-e-hasti mein magar

be nawa be ashiyan be par raha

sab chaman walon ne to lauti bahar

aur mujhe sayyad hi ka dar raha

koi samjha rind koi muttaqi

lab pe tauba hath mein saghar raha

tham rahe ansu rahi dil mein jalan

nam rahen ankhen kaleja tar raha

umr bhar phirta raha main dar badar

mar ke bhi charcha mira ghar ghar raha

saikron fikren hain tum ko aqilo

tum se to majzub hi behtar raha