جلوہ اس بت کا چراغ رہ عرفاں نکلا

جلوہ اس بت کا چراغ رہ عرفاں نکلا

دیر سے ہو کے برہمن بھی مسلماں نکلا

بیٹھ کر دل سے نہ پھر تیر کا پیکاں نکلا

ہائے اک پردہ نشیں جان کا خواہاں نکلا

اف رے شوخی کی ادا بزم عزا سے میری

مسکراتا ہوا وہ فتنۂ دوراں نکلا

کس کی زلفوں کا تصور تھا دم فکر سخن

دل سے مضمون جو نکلا وہ پریشاں نکلا

آج اک جام پہ ساقی نے چڑھائی تیوری

عید کے دن بھی ہلال مہ رمضاں نکلا

راہ صحرائے جنوں قیس سے بھی طے نہ ہوئی

ایک اک ذرے میں ایک ایک بیاباں نکلا

نام ہے معرکۂ شعر میں اپنا صفدرؔ

ہاتھ سے میرے نہ اب تک کوئی میداں نکلا

jalwa us but ka charagh-e-rah-e-irfan nikla

der se ho ke barahman bhi musalman nikla

baith kar dil se na phir tir ka paikan nikla

hae ik parda nashin jan ka khwahan nikla

uf re shokhi ki ada bazm-e-aza se meri

muskurata hua wo fitna-e-dauran nikla

kis ki zulfon ka tasawwur tha dam-e-fikr-e-sukhan

dil se mazmun jo nikla wo pareshan nikla

aj ik jam pe saqi ne charhai tewri

eid ke din bhi hilal-e-mah-e-ramzan nikla

rah-e-sahra-e-junun qais se bhi tai na hui

ek ik zarre mein ek ek bayaban nikla

nam hai marka-e-sher mein apna safdar

hath se mere na ab tak koi maidan nikla