آج انکار نہ فرمائیے آپ

آج انکار نہ فرمائیے آپ

شب کی شب گھر مرے رہ جائیے آپ

جائیے گھر کو نہ گھبرائیے آپ

ہم نہ مر جائیں گے بس جائیے آپ

کھول دو شوق سے بند انگیا کے

لیٹ کر ساتھ نہ شرمائیے آپ

آتے ہی کہتے ہو میں جاؤں گا

میں بھی آنے کا نہیں جائیے آپ

ڈھونڈھتے پھریے اگر لے کے چراغ

مجھ سا عاشق جو کہیں پائیے آپ

عمر بھر تو نہ قدم رنجہ کیا

آئیے اب تو نہ ترسائیے آپ

جان مشتاق لبوں پر آئی

کچھ وصیت ہے وہ سن جائیے آپ

دل سمجھتا نہیں مجھ سے ناصح

آپ سے سمجھے تو سمجھایئے آپ

سایہ ساں شوق میں افتاں خیزاں

ساتھ رہتا ہوں جدھر جائیے آپ

میں دکھاؤں جو جنوں کی ہے صفت

شان بے رحمی کی دکھلائیے آپ

ٹکڑے ٹکڑے میں گریباں کے کروں

پرزے پرزے مرے آڑائیے آپ

شاد ہو روح اگر بعد فنا

شمع و گل گور پہ بھجوائیے آپ

جان صدقے کروں کیا مال ہے جان

کاٹ دوں سر کو جو فرمائیے آپ

منہ پہ منہ رکھا تو بولے کیا خوب

پہلے منہ اپنا تو بنوایئے آپ

غیر کٹنے لگیں بندھ جائے ہوا

مجھ سے تکل اگر اڑوائیے آپ

نام تک لوں نہ کبھی ہوں وہ بشر

اب اگر حور بھی بن جائیے آپ

ہاتھ سے رندؔ کو کھوتے ہو عبث

کہیں ایسا نہ ہو پچھتائیے آپ

aj inkar na farmaiye ap

shab ki shab ghar mire rah jaiye ap

jaiye ghar ko na ghabraiye ap

ham na mar jaenge bas jaiye ap

khol do shauq se band angiya ke

let kar sath na sharmaiye ap

ate hi kahte ho main jaunga

main bhi ane ka nahin jaiye ap

dhundhte phiriye agar le ke charagh

mujh sa ashiq jo kahin paiye ap

umr bhar to na qadam ranjhu kiya

aiye ab to na tarsaye ap

jan mushtaq labon par ai

kuchh wasyyat hai wo sun jaiye ap

dil samajhta nahin mujh se naseh

ap se samjhe to samjhaiye ap

saya san shauq mein iftan khezan

sath rahta hun jidhar jaiye ap

main dikhaun jo junun ki hai sifat

shan-e-be rahmi ki dikhlaiye ap

tukre tukre mein gareban ke karun

purze purze mire araye ap

shad ho ruh agar baad-e-fana

shama-o-gul gor pe bhijwaiye ap

jan sadqe karun kya mal hai jan

kat dun sar ko jo farmaiye ap

munh pe munh rakha to bole kya khub

pahle munh apna to banwaiye ap

ghair katne lagen bandh jae hua

mujh se tukkal agar urwaiye ap

nam tak lun na kabhi hun wo bashar

ab agar hur bhi ban jaiye ap

hath se rind ko khote ho abas

kahin aisa na ho pachhtaiye ap