جفائیں دیکھ لیاں بے وفائیاں دیکھیں

جفائیں دیکھ لیاں بے وفائیاں دیکھیں

بھلا ہوا کہ تری سب برائیاں دیکھیں

تری گلی سے سدا اے کشندۂ عالم

ہزاروں آتی ہوئی چارپائیاں دیکھیں

گیا نظر سے جو وہ گرم طفل آتش باز

ہم اپنے چہرے پہ اڑتی ہوائیاں دیکھیں

ترے وصال کے ہم شوق میں ہوں آوارہ

عزیز دوست سبھوں کی جدائیاں دیکھیں

ہمیشہ مائل آئینہ ہی تجھے پایا

جو دیکھیں ہم نے یہی خود نمائیاں دیکھیں

شہاں کہ کحل جواہر تھی خاک پا جن کی

انہیں کی آنکھوں میں پھرتے سلائیاں دیکھیں

بنی نہ اپنی تو اس جنگ جو سے ہرگز میرؔ

لڑائیں جب سے ہم آنکھیں لڑائیاں دیکھیں

jafaen dekh liyan be wafaiyan dekhen

bhala hua ke tiri sab buraiyan dekhen

tiri gali se sada ai kashnda-e-alam

hazaron ati hui charpaiyan dekhen

gaya nazar se jo wo garm tifl-e-atish baz

ham apne chehre pe urti hawaiyan dekhen

tire wisal ke ham shauq mein hun awara

aziz dost sabhon ki judaiyan dekhen

hamesha mail aina hi tujhe paya

jo dekhen ham ne yahi khud numaiyan dekhen

shahan ke kohl-e-jawahir thi khak-e-pa jin ki

unhen ki ankhon mein phirte silaiyan dekhen

bani na apni to is jang jo se hargiz mir

laraen jab se ham ankhen laraiyan dekhen