جسے گرم اختلاطی کی لگا دے دل میں تو آتش

جسے گرم اختلاطی کی لگا دے دل میں تو آتش

پھر اس کے سنگ تربت سے نہیں بجھتی کبھو آتش

لگائی تو نے یاں تک میکدے میں تند خو آتش

کہ پیالا ہے پر آتش اور صراحی تا گلو آتش

یہ آتش باغ میں ہم نے لگی دیکھی تھی کل تجھ بن

نسیم آتش چمن آتش گل آتش گل کی بو آتش

لکھیں ہم کس طرح کاغذ پر اپنا سوز دل تجھ کو

کہ دل آتش زباں آتش دم آتش گفتگو آتش

تف دل کے بجھانے کو ہماری خاک پر ساقی

چھڑکنا ہے مے گلگوں کی از دست سبو آتش

ہمارے آشیاں کے خار و خس کے تار و سوزن سے

کر اس چاک قبا سے شعلے کو اپنے رفو آتش

محبؔ کے دل میں داغ عشق کا کیوں کر نہ گل پھوٹے

کہ دیتا ہے بجائے آب آنکھوں سے لہو آتش

jise garm ikhtilati ki laga de dil mein to atish

phir us ke sang-e-turbat se nahin bujhti kabhu atish

lagai tu ne yan tak maikade mein tund khu atish

ke piyala hai par atish aur surahi ta galo atish

ye atish bagh mein ham ne lagi dekhi thi kal tujh bin

nasim-e-atish chaman atish gul atish gul ki bu atish

likhen ham kis tarah kaghaz par apna soz-e-dil tujh ko

ke dil atish zaban atish dam atish guftugu atish

taf-e-dil ke bujhane ko hamari khak par saqi

chhirakna hai mai gulgun ki az dast-e-subu atish

hamare ashiyan ke khar-o-khas ke tar-o-sozan se

kar is chak-e-qaba se shole ko apne rafu atish

muhib ke dil mein dagh-e-ishq ka kyun kar na gul phute

ke deta hai bajae ab ankhon se lahu atish