جلا بلا ہوں گرفتار حال اپنا ہوں

جلا بلا ہوں گرفتار حال اپنا ہوں

برنگ شمع سراپا وبال اپنا ہوں

اس اشک سرخ و رخ زرد سے سمجھ لے تو

بیان کیا کروں خود عرض حال اپنا ہوں

قرار پکڑے مرے دل میں کب کسی کی شکل

برنگ آئینہ محو جمال اپنا ہوں

نہ ماہتاب ہوں نے آفتاب ہوں یارب

یہ کیا سبب ہے کہ آپھی زوال اپنا ہوں

جہان خواب تماشا جہان کا سب خواب

خیال خوب کیا تو خیال اپنا ہوں

بہ رنگ نقش قدم میں پڑا ہوں در پہ ترے

نہ پائمال کر اے نونہال اپنا ہوں

رہ سلوک میں ؔجوشش کسی کا مزرع دل

جو پائمال کروں پائمال اپنا ہوں

jala bala hun giraftar hal apna hun

barang-e-shama sarapa wabal apna hun

is ashk-e-surkh-o-rukh-e-zard se samajh le to

bayan kya karun khud arz-e-hal apna hun

qarar pakre mire dil mein kab kisi ki shakl

barang aina mahw-e-jamal apna hun

na mahtab hun ne aftab hun yarab

ye kya sabab hai ke aphi zawal apna hun

jahan-e-khwab-e-tamasha jahan ka sab khwab

khayal khub kiya to khayal apna hun

ba rang naqsh-e-qadam mein para hun dar pe tire

na paimal kar ai naunihal apna hun

rah-e-suluk mein joshish kisi ka mazraa dil

jo paimal karun paimal apna hun