جاتی ہے دھوپ اجلے پروں کو سمیٹ کے

جاتی ہے دھوپ اجلے پروں کو سمیٹ کے

زخموں کو اب گنوں گا میں بستر پہ لیٹ کے

میں ہاتھ کی لکیریں مٹانے پہ ہوں بضد

گو جانتا ہوں نقش نہیں یہ سلیٹ کے

دنیا کو کچھ خبر نہیں کیا حادثہ ہوا

پھینکا تھا اس نے سنگ گلوں میں لپیٹ کے

فوارے کی طرح نہ اگل دے ہر ایک بات

کم کم وہ بولتے ہیں جو گہرے ہیں پیٹ کے

اک نقرئی کھنک کے سوا کیا ملا شکیبؔ

ٹکڑے یہ مجھ سے کہتے ہیں ٹوٹی پلیٹ کے

jati hai dhup ujle paron ko samet ke

zakhmon ko ab ginunga mein bistar pe let ke

main hath ki lakiren mitane pe hun bazid

go janta hun naqsh nahin ye salet ke

duniya ko kuchh khabar nahin kya hadisa hua

phenka tha us ne sang gulon mein lapet ke

faware ki tarah na ugal de har ek bat

kam kam wo bolte hain jo gahre hain pet ke

ik nuqrai khanak ke siwa kya mila shakeb

tukre ye mujh se kahte hain tuti palet ke