تیرے عاشق کو طلب گل کی نہ گلزار کی تھی

تیرے عاشق کو طلب گل کی نہ گلزار کی تھی

جوش وحشت میں ہوس وادیٔ پر خار کی تھی

تیرے جھونکوں نے اڑایا ہے جسے وقت سحر

اے صبا خاک وہ میرے دل بیمار کی تھی

چمن عشق و محبت میں بسان نرگس

آنکھ حسرت سے کھلی طالب دیدار کی تھی

شب تاریک سے فرقت کی میں کیوں گھبراتا

وہ سیاہی بھی ترے گیسوئے خم دار کی تھی

خواہش دید پہ بیکار بگڑ جاتے ہیں

یہ تو فرمائیے کیا بات یہ تکرار کی تھی

وہ جو اٹھے تو قیامت نے اٹھایا سر کو

وہ بھی محتاج مگر قامت دل دار کی تھی

ضعف نے کر دیا خاموش جمیلہؔ ورنہ

ہم سے رونق تو کبھی کوچۂ دل دار کی تھی

tere ashiq ko talab gul ki na gulzar ki thi

josh-e-wahshat mein hawas wadi-e-pur khar ki thi

tere jhonkon ne uraya hai jise waqt-e-sahar

ai saba khak wo mere dil-e-bimar ki thi

chaman-e-ishq-o-mohabbat mein basan-e-nargis

ankh hasrat se khuli talib-e-didar ki thi

shab-e-tarik se furqat ki main kyun ghabrata

wo siyahi bhi tire gesu-e-kham dar ki thi

khwahish-e-did pe bekar bigar jate hain

ye to farmaiye kya bat ye takrar ki thi

wo jo uthe to qayamat ne uthaya sar ko

wo bhi mohtaj magar qamat-e-dil dar ki thi

zof ne kar diya khamosh jamilahu warna

ham se raunaq to kabhi kucha-e-dil dar ki thi