تیرے ہاتھوں سے مٹے گا نقش ہستی ایک دن

تیرے ہاتھوں سے مٹے گا نقش ہستی ایک دن

باڑھ رکھ دے گی چھری پر تیز دستی ایک دن

تیری آنکھوں سے دل نازک گرے گا نشہ میں

طاق سے شیشہ گرا دے گی یہ مستی ایک دن

زاہدو پوجا تمہاری خوب ہوگی حشر میں

بت بنا دے گی تمہیں یہ حق پرستی ایک دن

آنکھیں دوزخ میں بھی سینکے گا ترا دل سوختہ

آگ بن جائے گی یہ آتش پرستی ایک دن

خوبیٔ شمشیر ابرو کا تماشا دیکھتے

دونوں باگوں آپ کی تلوار کستی ایک دن

خون میرا رائیگاں ناحق بہاتے ہیں حضور

کرنی ہے رنگ حنا کی پیش دستی ایک دن

جلد پستاں تک مرا کب تک نہ ہوگا دسترس

ان ترنجوں کی بھی قیمت ہوگی سستی ایک دن

زلف کافر کیش لپٹے گی قدم سے اے صنم

ہندو شب بھی کرے گا بت پرستی ایک دن

جان بخشو سر مرے لاشہ کا ٹھکراؤ کبھی

ساغر خالی میں بھر دو شہد ہستی ایک دن

نیل گوں کر دیں گے مل کر چھاتیاں اے رشک مہر

تیری انگیا کی کٹوری ہوگی جستی ایک دن

خوب کر تعریف نواب ظفر جنگ اے منیرؔ

کام آ جائے گی یہ آقا پرستی ایک دن

tere hathon se mitega naqsh-e-hasti ek din

barh rakh degi chhuri par tez dasti ek din

teri ankhon se dil-e-nazuk girega nasha mein

taq se shisha gira degi ye masti ek din

zahido puja tumhari khub hogi hashr mein

but bana degi tumhen ye haq parasti ek din

ankhen dozakh mein bhi senkega tira dil-e-sokhta

ag ban jaegi ye atish parasti ek din

khubi-e-shamshir-e-abru ka tamasha dekhte

donon bagon ap ki talwar kasti ek din

khun mera raigan nahaq bahate hain huzur

karni hai rang-e-hina ki pesh dasti ek din

jald pistan tak mira kab tak na hoga dastaras

in turanjon ki bhi qimat hogi sasti ek din

zulf-e-kafir kesh liptegi qadam se ai sanam

hindu shab bhi karega but parasti ek din

jan bakhsho sar mire lasha ka thukrao kabhi

saghar-e-khali mein bhar do shahd hasti ek din

nil gun kar denge mil kar chhatiyan ai rashk-e-mehr

teri angiya ki katori hogi jasti ek din

khub kar taarif nawwab-e-zafar jang ai munir

kam a jaegi ye aqa parasti ek din