ثابت رہا فلک مرے نالوں کے سامنے

ثابت رہا فلک مرے نالوں کے سامنے

ٹھہری سپر حباب کے بھالوں کے سامنے

موسیٰ ہیں غش میں گیسوؤں والوں کے سامنے

گل ہے چراغ طور بھی کالوں کے سامنے

پھولوں کا رنگ زرد ہے گالوں کے سامنے

سنبل میں بل نہیں ترے بالوں کے سامنے

رکھوائے جھاڑ اس نے نہالوں کے سامنے

قلمیں لگیں بلور کی ڈالوں کے سامنے

جاتا ہوں جب خزاں میں نہالوں کے سامنے

آنکھوں سے نہریں بہتی ہیں تھالوں کے سامنے

پھولے شفق تو زرد ہو گالوں کے سامنے

پانی بھرے گھٹا ترے بالوں کے سامنے

تارے ہوئے غروب خط و خال دیکھ کر

گوروں کے پاؤں اٹھ گئے گالوں کے سامنے

آنکھوں میں پھرتے ہیں نہیں آتے ہیں روبرو

پردے پڑے ہیں دیکھنے والوں کے سامنے

دیکھا ہے عاشقوں نے برہمن کی آنکھ سے

ہر بت خدا ہے چاہنے والوں کے سامنے

چھٹ جائیں گے اسیر چھپا زلف خم نجم

کٹتی ہیں بیڑیاں ترے بالوں کے سامنے

بیتاب دست شوق ہیں جوبن کے روبرو

بوسہ میں جاں بلب ترے گالوں کے سامنے

افراط مے سے مجھ کو یہ جوش سرور ہے

بجواؤں جل ترنگ میں پیالوں کے سامنے

جلد بدن ہے تختۂ مشق سپاہ غم

رہتی ہے یہ کتاب رسالوں کے سامنے

آنکھیں تمہاری دیکھ کے کچھ سوجھتا نہیں

بھولا ہوں چوکڑی میں غزالوں کے سامنے

دروازوں پر بتوں کے لگایا کئے الاؤ

ہولی جلائی ہم نے شوالوں کے سامنے

زلفوں میں دیکھتا ہوں ترا چہرۂ صبیح

لبریز جام شیر ہے کالوں کے سامنے

تیرے گدا سے بند ہے عالم کا ناطقہ

آتے نہیں جواب سوالوں کے سامنے

کھینچے بتوں نے اپنی طرف زاہدوں کے دل

قبلہ نما پھرے ہیں شوالوں کے سامنے

چوری سے بوسۂ کف پا لیں جو اے پری

ہونٹ اپنے چوم لوں ترے گالوں کے سامنے

پہنچا فلک کو فقر کا رتبہ حضور عیش

کمبل چڑھے ہیں چرخ دو شالوں کے سامنے

اہل کتاب ہیں صف مژگاں کے روبرو

کاغذ کے دستے آئے رسالوں کے سامنے

فیاض سائلوں سے نہیں کرتے سرکشی

شیشوں کے سر جھکے ہیں پیالوں کے سامنے

دست جفا اٹھائیں گے کیا جسم زار پر

کانٹا ہوں تیغ ناز کے چھالوں کے سامنے

شیشے کو حسن گرم نے پارہ بنا دیا

آئینے اڑ گئے ترے گالوں کے سامنے

تیغ نگہ کو موتیوں کی ڈاب چاہئے

آئینہ رکھ کے دیکھیے چھالوں کے سامنے

جلتے رہے بتوں کی حضوری میں شمع رو

پریاں ستی ہوئی ہیں شوالوں کے سامنے

ہم چشموں پر لگائی ہیں اس بت نے گولیاں

توڑے ہوئے ہیں شیر غزالوں کے سامنے

جادہ بنت بنا مری وحشت کے فیض سے

گوٹے کے گو کہر ہوئے چھالوں کے سامنے

میرے ہنر کا کوئی نہیں قدرداں منیرؔ

شرمندہ ہوں میں اپنے کمالوں کے سامنے

sabit raha falak mire nalon ke samne

thahri sipar habab ke bhalon ke samne

musa hain ghash mein gesuon walon ke samne

gul hai charagh-e-tur bhi kalon ke samne

phulon ka rang-e-zard hai galon ke samne

sumbul mein bal nahin tire balon ke samne

rakhwae jhar us ne nihalon ke samne

qalmen lagen bilur ki dalon ke samne

jata hun jab khizan mein nihalon ke samne

ankhon se nahren bahti hain thalon ke samne

phule shafaq to zard ho galon ke samne

pani bhare ghata tire balon ke samne

tare hue ghurub-e-khat-o-khal dekh kar

goron ke paon uth gae galon ke samne

ankhon mein phirte hain nahin ate hain rubaru

parde pare hain dekhne walon ke samne

dekha hai ashiqon ne barahman ki ankh se

har but khuda hai chahne walon ke samne

chhut jaenge asir chhupa zulf-e-kham-e-najm

katti hain beriyan tire balon ke samne

betab dast-e-shauq hain joban ke rubaru

bosa mein jan balb tire galon ke samne

ifrat-e-mai se mujh ko ye josh-e-surur hai

bajwaun jal tarang mein pyalon ke samne

jald badan hai takhta-e-mashq sipah-e-gham

rahti hai ye kitab-e-risalon ke samne

ankhen tumhari dekh ke kuchh sujhta nahin

bhula hun chaukari mein ghazalon ke samne

darwazon par buton ke lagaya kiye alao

holi jalai ham ne shawwalon ke samne

zulfon mein dekhta hun tira chehra-e-sabih

labrez jam-e-sher hai kalon ke samne

tere gada se band hai alam ka natiqa

ate nahin jawab sawalon ke samne

khinche buton ne apni taraf zahidon ke dil

qibla numa phire hain shawwalon ke samne

chori se bosa-e-kaf-e-pa len jo ai pari

hont apne chum lun tire galon ke samne

pahuncha falak ko faqr ka rutba huzur-e-aish

kambal charhe hain charkh do shalon ke samne

ahl-e-kitab hain saf-e-mizhgan ke rubaru

kaghaz ke diste ae risalon ke samne

fayyaz sailon se nahin karte sarkashi

shishon ke sar jhuke hain pyalon ke samne

dast-e-jafa uthaenge kya jism-e-zar par

kanta hun tegh-e-naz ke chhalon ke samne

shishe ko husn garm ne para bana diya

aine ur gae tire galon ke samne

tegh-e-nigah ko motiyon ki dab chahiye

aina rakh ke dekhiye chhalon ke samne

jalte rahe buton ki huzuri mein shama ro

pariyan sati hui hain shawwalon ke samne

ham chashmon par lagai hain us but ne goliyan

tore hue hain sher ghazalon ke samne

jada bint bana miri wahshat ke faiz se

gote ke go kohr hue chhalon ke samne

mere hunar ka koi nahin qadardan munir

sharminda hun main apne kamalon ke samne