تیغ نگہ دیدۂ خوں خار نکالی

تیغ نگہ دیدۂ خوں خار نکالی

کیوں آپ نے عشاق پہ تلوار نکالی

بھولے ہیں غزالان حرم راہ خطا سے

تم نے عجب انداز کی رفتار نکالی

دھڑکا مرے نالہ کا رہا مرغ سحر کو

آواز شب وصل نہ زنہار نکالی

ہر گھر میں کہے رکھتے ہیں کہرام پڑے گا

گر لاش ہماری سر بازار نکالی

آخر مری تربت سے اگی ہے گل نرگس

کیا باد فنا حسرت دیدار نکالی

میں وصل کا سائل ہوں نہ وعدے کا طلبگار

باتوں میں عبث آپ نے تکرار نکالی

جل جائے گا یہ خرمن ہستی ابھی اے دل

سینے سے اگر آہ شرربار نکالی

دل لے کے بھی رعناؔ کا کیا پاس نہ افسوس

کچھ حسرت دل تو نے نہ عیار نکالی

tegh-e-nigah-e-dida-e-khun khar nikali

kyun ap ne ushshaq pe talwar nikali

bhule hain ghazalan-e-haram rah khata se

tum ne ajab andaz ki raftar nikali

dharka mire nala ka raha murgh-e-sahar ko

awaz-e-shab wasl na zinhar nikali

har ghar mein kahe rakhte hain kohram parega

gar lash hamari sar-e-bazar nikali

akhir miri turbat se ugi hai gul-e-nargis

kya bad-e-fana hasrat-e-didar nikali

main wasl ka sail hun na waade ka talabgar

baton mein abas ap ne takrar nikali

jal jaega ye khirman-e-hasti abhi ai dil

sine se agar ah shararbar nikali

dil le ke bhi raana ka kiya pas na afsos

kuchh hasrat-e-dil tu ne na ayyar nikali