جا بیٹھتے ہو غیروں میں غیرت نہیں آتی — واجد علی شاہ

Arooz is now on the App Store, for iPhone and iPad. Download →

واجد علی شاہ

جا بیٹھتے ہو غیروں میں غیرت نہیں آتی

اس وقت مری جان مروت نہیں آتی

نزدیک بھی جا کر نہ ملا پردہ نشیں سے

جا دور ہو اے دل تجھے چاہت نہیں آتی

اک ہم ہیں کہ ہیں نام مبارک پہ تصدق

تم کو تو کبھی دیکھ کے الفت نہیں آتی

یا رنج ہے یا ہجر ہے یا حزن ہے یا غم

کچھ شکل بنا کر تو مصیبت نہیں آتی

کیا راہ روی یار کی سیکھے ہے تو اس سال

اس طرح گئی جسم سے طاقت نہیں آتی

ہر شے کے لئے ظرف ہے درکار جہاں میں

کم ظرف کے نزدیک تو ثروت نہیں آتی

کلکتے نے نابود کیا خواب خوشی کو

پل بھر مجھے اس شہر میں راحت نہیں آتی

رہتا ہوں خیال رخ زیبا میں شب و روز

اے جان تصور میں وہ صورت نہیں آتی

کھلتے ہیں گل شعر ہر اک روز مہ و سال

اخترؔ مرے گلزار پہ آفت نہیں آتی