یہ مشت خاک اپنے کو جہاں چاہے تہاں لے جا

یہ مشت خاک اپنے کو جہاں چاہے تہاں لے جا

پر اس عالم کو اس عالم سے مت بار گراں لے جا

عدم سے جس طرح تنہا چلا آیا تھا پھر واں کو

مناسب ہے اسی صورت سے صورت چھوڑ جاں لے جا

کدورت ماسوا کی دھو لے خاطر خواہ خاطر سے

بجز نام خدا ہم راہ مت نام و نشاں لے جا

عزیز و اقربا نے مال و ملکیت بکار آوے

کسی کی دوستی کی اے دلا حسرت نہ واں لے جا

گدائی بادشاہی بھی مساوی وقت مرنے کے

تیقن کر سخن میری پر ہرگز مت گماں لے جا

اسی دنیا میں دنیا سے کنارہ کر جو عاقل ہے

محبت پھر کسی شے کی نہ ساتھ اے مہرباں لے جا

نہ کوئی لے گیا کچھ اور نہ لے جاوے کوئی ہرگز

یقیں گور و کفن ملنے پہ کیا تشکیک ہاں لے جا

گئی باغ جہاں سے خلق خالی ہاتھ لے پر تو

بہار زندگی سے ذکر کا گل بے خزاں لے جا

بکھیڑا یاں کا یاں پر چھوڑ افریدیؔ عدم آخر

نہ یہ درد و بلا رنج و الم آہ و فغاں لے جا

ye musht-e-khak apne ko jahan chahe tahan le ja

par is alam ko is alam se mat bar-e-giran le ja

adam se jis tarah tanha chala aya tha phir wan ko

munasib hai isi surat se surat chhor jan le ja

kudurat masiwa ki dho le khatir khwah-e-khatir se

bajuz nam-e-khuda ham rah mat nam-o-nishan le ja

aziz-o-aqriba ne mal-o-milkiyyat bakar awe

kisi ki dosti ki ai dila hasrat na wan le ja

gadai badshahi bhi musawi waqt marne ke

tayaqun kar sukhan meri par hargiz mat guman le ja

isi duniya mein duniya se kinara kar jo aqil hai

mohabbat phir kisi shai ki na sath ai mehrban le ja

na koi le gaya kuchh aur na le jawe koi hargiz

yaqin gor-o-kafan milne pe kya tashkik han le ja

gai bagh-e-jahan se khalq khali hath le par to

bahar-e-zindagi se zikr ka gul be khizan le ja

bakhera yan ka yan par chhor afredi adam akhir

na ye dard-o-bala ranj-o-alam ah-o-fughan le ja