یہ رنگ گلاب کی کلی کا

یہ رنگ گلاب کی کلی کا

نقشہ ہے کس کی کم سنی کا

بلبل کی بہار میں نہ پوچھو

منہ چومتی ہے کلی کلی کا

ہر وقت ہیں موت کی دعائیں

اللہ رے لطف زندگی کا

غنچوں کو صبا نے گدگدایا

دشوار ہے ضبط اب ہنسی کا

سمجھے تھے نہ ہم کہ تم پہ مرنا

ہو جائے گا روگ زندگی کا

ہوں ایک سے سب حسین کیونکر

ہے رنگ جدا کلی کلی کا

منہ پھیر کے یوں چلی جوانی

یاد آ گیا روٹھنا کسی کا

آئینہ بنا رہے ہو دل کا

دل ٹوٹ نہ جائے آرسی کا

دیکھو نہ جلیلؔ کو مٹاؤ

مٹ جائے گا نام عاشقی کا

ye rang gulab ki kali ka

naqsha hai kis ki kam suni ka

bulbul ki bahar mein na puchho

munh chumti hai kali kali ka

har waqt hain maut ki duaen

allah re lutf-e-zindagi ka

ghunchon ko saba ne gudgudaya

dushwar hai zabt ab hansi ka

samjhe the na ham ke tum pe marna

ho jaega rog zindagi ka

hun ek se sab hasin kyunkar

hai rang juda kali kali ka

munh pher ke yun chali jawani

yad a gaya ruthna kisi ka

aina bana rahe ho dil ka

dil tut na jae arsi ka

dekho na jalil ko mitao

mit jaega nam-e-ashiqi ka