Arooz is now on the App Store, for iPhone and iPad. Download →

All poetry

یہ آہ بے اثر کیا ہو یہ نخل بے ثمر کیا ہو

Nazm Tabatabai (1854–1933)

یہ آہ بے اثر کیا ہو یہ نخل بے ثمر کیا ہو

نہ ہو جب درد ہی یا رب تو دل کیا ہو جگر کیا ہو

بغل گیر آرزو سے ہیں مرادیں آرزو مجھ سے

یہاں اس وقت تو اک عید ہے تم جلوہ گر کیا ہو

مقدر میں یہ لکھا ہے کٹے گی عمر مر مر کر

ابھی سے مر گئے ہم دیکھیے اب عمر بھر کیا ہو

مروت سے ہو بیگانہ وفا سے دور ہو کوسوں

یہ سچ ہے نازنیں ہو خوبصورت ہو مگر کیا ہو

لگا کر زخم میں ٹانکے قضا تیری نہ آ جائے

جو وہ سفاک سن پائے بتا اے چارہ گر کیا ہو

قیامت کے بکھیڑے پڑ گئے آتے ہی دنیا میں

یہ مانا ہم نے مر جانا تو ممکن ہے مگر کیا ہو

کہا میں نے کہ نظمؔ مبتلا مرتا ہے حسرت میں

کہا اس نے اگر مر جائے تو میرا ضرر کیا ہو