یہ جس نے جان دی ہے نان دے گا

یہ جس نے جان دی ہے نان دے گا

دیا ہے جس نے سر سامان دے گا

مژہ سے اس کماں ابرو کی بچنا

وہ ناوک ہے کلیجہ چھان دے گا

مشقت سے وہ دے یا بے مشقت

بہ ہر صورت بہ ہر عنوان دے گا

وہ بوسہ دے کے دل لے کر یہ بولے

عوض احساں کا کیا انسان دے گا

ملے گا قدر دان عشق ہم کو

خدا معشوق با ایمان دے گا

سنیں گے تب بتان ہند اپنی

اجازت جب انہیں شیطان دے گا

فسانہ کوہ کن کا سن کے بولے

جو عاشق ہوگا وہ ہی جان دے گا

نہ تھی امید تجھ سے قاسم بخت

دل پر درد و پر ارمان دے گا

رہ الفت کا ہوں کار آزمودہ

کسی کو دل کوئی انجان دے گا

چلے گا تیر جب اپنی دعا کا

کلیجے دشمنوں کے چھان دے گا

مقدر سے زیادہ ایک لقمہ

گدا کیا لے گا کیا سلطان دے گا

لپٹ جاؤں گا ان سے روز وصلت

اگر مجھ کو خدا اوسان دے گا

نہ پھیلا منتہیؔ دست ہوس کو

وگرنہ یہ تجھے نقصان دے گا

ye jis ne jan di hai nan dega

diya hai jis ne sar saman dega

mizha se is kaman abru ki bachna

wo nawak hai kaleja chhan dega

mashaqqat se wo de ya be mashaqqat

ba har surat ba har unwan dega

wo bosa de ke dil le kar ye bole

ewaz ehsan ka kya insan dega

milega qadr dan-e-ishq ham ko

khuda maashuq ba iman dega

sunenge tab butan-e-hind apni

ijazat jab unhen shaitan dega

fasana koh kin ka sun ke bole

jo ashiq hoga wo hi jan dega

na thi ummid tujh se qasim-e-bakht

dil pur dard-o-par arman dega

rah-e-ulfat ka hun kar azmuda

kisi ko dil koi anjan dega

chalega tir jab apni dua ka

kaleje dushmanon ke chhan dega

muqaddar se ziyada ek luqma

gada kya lega kya sultan dega

lipat jaunga un se roz-e-waslat

agar mujh ko khuda ausan dega

na phaila muntahi dast-e-hawas ko

wagarna ye tujhe nuqsan dega