یہ آنکھیں ہیں تو سر کٹا کر رہیں گی

یہ آنکھیں ہیں تو سر کٹا کر رہیں گی

کسو سے ہمیں یاں لڑا کر رہیں گی

اگر یہ نگاہیں ہیں کم بخت اپنی

تو کچھ ہم کو تہمت لگا کر رہیں گی

یہ سفاکیاں ہیں تو جوں مرغ بسمل

ہمیں خاک و خوں میں ملا کر رہیں گی

کیا ہم نے معلوم نظروں سے تیری

کہ نظریں تری ہم کو کھا کر رہیں گی

یہ آئیں ہیں تو ایک دن آسماں کو

جلا کر کھپا کر اڑا کر رہیں گی

اگر گردشیں آسماں کی یہی ہیں

تو ہم کو بھی گردش میں لا کر رہیں گی

یہ آنکھیں ہیں تو ایک دن مصحفیؔ کو

نگاہوں کے اندر فنا کر رہیں گی

ye ankhen hain to sar kata kar rahengi

kisu se hamen yan lara kar rahengi

agar ye nigahen hain kam bakht apni

to kuchh ham ko tohmat laga kar rahengi

ye saffakiyan hain to jun murgh-e-bismil

hamen khak-o-khun mein mila kar rahengi

kiya ham ne maalum nazron se teri

ke nazren tiri ham ko kha kar rahengi

ye aen hain to ek din asman ko

jala kar khapa kar ura kar rahengi

agar gardishen asman ki yahi hain

to ham ko bhi gardish mein la kar rahengi

ye ankhen hain to ek din mushafi ko

nigahon ke andar fana kar rahengi