تعمیر زندگی کو نمایاں کیا گیا

تعمیر زندگی کو نمایاں کیا گیا

تخریب کائنات کا ساماں کیا گیا

گلشن کی شاخ شاخ کو ویراں کیا گیا

یوں بھی علاج تنگیٔ داماں کیا گیا

کھوئے ہوؤں پہ تیری نظر کی نوازشیں

آئینہ دے کے اور بھی حیراں کیا گیا

آوارگیٔ زلف سے آسودگی ملی

آسودگی ملی کہ پریشاں کیا گیا

وہ خوش نصیب ہوں کہ غم التفات سے

میرے غم حیات کا درماں کیا گیا

تنہائیاں بچھا کے جہان خراب میں

میرے لئے نگاہ کا ساماں کیا گیا

پھیلا کے بے ثباتیٔ عالم کی داستاں

مجھ پر حرام کیف بہاراں کیا گیا

بھڑکا کے آتش رخ جاناں کی آرزو

مجھ کو رہین آتش دوراں کیا گیا

نومیدیٔ طلب پہ چڑھا کے طلب کا رنگ

امید دید دوست کو ارزاں کیا گیا

یہ بھی کرم کہ مجھ کو شبان سیاہ میں

مامور دلنوازیٔ ہجراں کیا گیا

جمعیت جمال کا حسن کمال دیکھ

آخر یہی ہوا کہ پریشاں کیا گیا

دے کر چمن کو بہار و خزاں کا رنگ

میرے خیال و خواب پہ احساں کیا گیا

آ اور کائنات کے پھولوں کی داد دے

جن سے ترا جمال نمایاں کیا گیا

taamir zindagi ko numayan kiya gaya

takhrib kainat ka saman kiya gaya

gulshan ki shakh shakh ko wiran kiya gaya

yun bhi ilaj-e-tangi-e-daman kiya gaya

khoe huon pe teri nazar ki nawazishen

aina de ke aur bhi hairan kiya gaya

awargi-e-zulf se asudgi mili

asudgi mili ke pareshan kiya gaya

wo khush nasib hun ke gham-e-iltifat se

mere gham-e-hayat ka darman kiya gaya

tanhaiyan bichha ke jahan-e-kharab mein

mere liye nigah ka saman kiya gaya

phaila ke be sabati-e-alam ki dastan

mujh par haram kaif-e-baharan kiya gaya

bharka ke atish rukh janan ki arzu

mujh ko rahin-e-atish-e-dauran kiya gaya

naumidi-e-talab pe charha ke talab ka rang

ummid-e-did-e-dost ko arzan kiya gaya

ye bhi karam ke mujh ko shabin-e-siyah mein

mamur dilnawazi-e-hijran kiya gaya

jamiyyat-e-jamal ka husn-e-kamal dekh

akhir yahi hua ke pareshan kiya gaya

de kar chaman ko bahar-o-khizan ka rang

mere khayal-o-khwab pe ehsan kiya gaya

a aur kainat ke phulon ki dad de

jin se tira jamal-e-numayan kiya gaya