Arooz is now on the App Store, for iPhone and iPad. Download →

All poetry

یہ اک تیرا جلوہ صنم چار سو ہے

گویا فقیر محمد

یہ اک تیرا جلوہ صنم چار سو ہے

نظر جس طرف کیجیے تو ہی تو ہے

یہ کس مست کے آنے کی آرزو ہے

کہ دست دعا آج دست سبو ہے

نہ ہوگا کوئی مجھ سا محو تصور

جسے دیکھتا ہوں سمجھتا ہوں تو ہے

مکدر نہ ہو یار تو صاف کہہ دوں

نہ کیونکر ہو خودبیں کہ آئینہ رو ہے

کبھی رخ کی باتیں کبھی گیسوؤں کی

سحر سے یہی شام تک گفتگو ہے

کسی گل کے کوچے سے گزری ہے شاید

صبا آج جو تجھ میں پھولوں کی بو ہے

نہیں چاک دامن کوئی مجھ سا گویاؔ

نہ بخیہ کی خواہش نہ فکر رفو ہے