یہ آرزو تھی تجھے گل کے رو بہ رو کرتے

یہ آرزو تھی تجھے گل کے رو بہ رو کرتے

ہم اور بلبل بیتاب گفتگو کرتے

پیامبر نہ میسر ہوا تو خوب ہوا

زبان غیر سے کیا شرح آرزو کرتے

مری طرح سے مہ و مہر بھی ہیں آوارہ

کسی حبیب کی یہ بھی ہیں جستجو کرتے

ہمیشہ رنگ زمانہ بدلتا رہتا ہے

سفید رنگ ہیں آخر سیاہ مو کرتے

لٹاتے دولت دنیا کو میکدے میں ہم

طلائی ساغر مے نقرئی سبو کرتے

ہمیشہ میں نے گریباں کو چاک چاک کیا

تمام عمر رفوگر رہے رفو کرتے

جو دیکھتے تری زنجیر زلف کا عالم

اسیر ہونے کی آزاد آرزو کرتے

بیاض گردن جاناں کو صبح کہتے جو ہم

ستارۂ سحری تکمۂ گلو کرتے

یہ کعبے سے نہیں بے وجہ نسبت رخ یار

یہ بے سبب نہیں مردے کو قبلہ رو کرتے

سکھاتے نالۂ شبگیر کو در اندازی

غم فراق کا اس چرخ کو عدو کرتے

وہ جان جاں نہیں آتا تو موت ہی آتی

دل و جگر کو کہاں تک بھلا لہو کرتے

نہ پوچھ عالم برگشتہ طالعی آتشؔ

برستی آگ جو باراں کی آرزو کرتے

ye arzu thi tujhe gul ke ru ba ro karte

ham aur bulbul-e-betab guftugu karte

payambar na muyassar hua to khub hua

zaban-e-ghair se kya sharh-e-arzu karte

miri tarah se mah-o-mehr bhi hain awara

kisi habib ki ye bhi hain justuju karte

hamesha rang-e-zamana badalta rahta hai

safed rang hain akhir siyah mu karte

lutate daulat-e-duniya ko maikade mein ham

tilai saghar-e-mai nuqrai subu karte

hamesha main ne gareban ko chak chak kiya

tamam umr rafugar rahe rafu karte

jo dekhte tiri zanjir zulf ka alam

asir hone ki azad arzu karte

bayaz-e-gardan janan ko subh kahte jo ham

sitara-e-sahari tukma-e-galo karte

ye kaabe se nahin be wajh nisbat-e-rukh yar

ye be sabab nahin murde ko qibla ro karte

sikhate nala-e-shabgir ko dar andazi

gham-e-firaq ka is charkh ko adu karte

wo jan-e-jan nahin ata to maut hi ati

dil-o-jigar ko kahan tak bhala lahu karte

na puchh alam bargashta talii atish

barasti ag jo baran ki arzu karte