یوں ہے اس دل کو دوگانہ کی نشانی کی ہوس

یوں ہے اس دل کو دوگانہ کی نشانی کی ہوس

ریت میں مچھلی کو جوں ہوتی ہے پانی کی ہوس

اپنی بیتی ہی کہا کرتی ہوں میں راتوں کو

دھیان قصہ کا مجھے ہے نہ کہانی کی ہوس

جی میں اپنے اسے نادان سمجھتی ہوں میں

دل میں جو رکھتی ہے اس عالم فانی کی ہوس

ہے درخت ایسا کہاں جس کو لگی ہو نہ ہوا

کوئی ایسا نہیں جس کو نہیں پانی کی ہوس

آرزو گر ہے مرے دل میں تو ہے رنگیںؔ کی

لال جوڑے کی خوشی کچھ ہے نہ دھانی کی ہوس

yun hai is dil ko dogana ki nishani ki hawas

ret mein machhli ko jun hoti hai pani ki hawas

apni biti hi kaha karti hun main raton ko

dhyan qissa ka mujhe hai na kahani ki hawas

ji main apne use nadan samajhti hun main

dil mein jo rakhti hai is alam-e-fani ki hawas

hai darakht aisa kahan jis ko lagi ho na hua

koi aisa nahin jis ko nahin pani ki hawas

arzu gar hai mire dil mein to hai rangin ki

lal jore ki khushi kuchh hai na dhani ki hawas