یک بیک جاتا رہا دلبر جو گھر آیا ہوا

یک بیک جاتا رہا دلبر جو گھر آیا ہوا

دوڑا دوڑا میں پھرا گلیوں میں گھبرایا ہوا

جان کیا جلاد کی لیوے دوبارا حکم قتل

منہ سے اس ظالم نے جو یکبار فرمایا ہوا

ہجر میں اس گل کے یہ صورت ہماری بن گئی

رنگ بھی ہے زرد اور چہرہ بھی مرجھایا ہوا

خانۂ دل سے کریں غم یار کا کس طرح دور

در سے اٹھتا ہے محصل کوئی بٹھلایا ہوا

کیا غضب ٹوٹے ہے دیکھیں عاشقوں کی جان پر

آج کچھ غصہ میں ہے بیٹھا وہ جھنجھلایا ہوا

یوں کیا برباد اس گل نے دل پژمردہ کو

پھینک دے ہے پھول جیسے کوئی کملایا ہوا

منتظرؔ کا جی جلا دے کیوں نہ ہر اک بات میں

ہے وہ ظالم شعلہ خو غیروں کا بھڑکایا ہوا

yak bayak jata raha dilbar jo ghar aya hua

daura daura mein phira galiyon mein ghabraya hua

jan kya jallad ki lewe dobara hukm-e-qatl

munh se us zalim ne jo yakbar farmaya hua

hijr mein us gul ke ye surat hamari ban gai

rang bhi hai zard aur chehra bhi murjhaya hua

khana-e-dil se karen gham yar ka kis tarah dur

dar se uthta hai muhassil koi bithlaya hua

kya ghazab tute hai dekhen ashiqon ki jan par

aj kuchh ghussa mein hai baitha wo jhanjhlaya hua

yun kiya barbad us gul ne dil-e-pazhmurda ko

phenk de hai phul jaise koi kamlaya hua

muntazir ka ji jala de kyun na har ik bat mein

hai wo zalim shola khu ghairon ka bhirkaya hua