یوں تڑپتے ہوئے نوشادؔ وطن سے نکلے — راجہ نوشاد علی خان

Arooz is now on the App Store, for iPhone and iPad. Download →

راجہ نوشاد علی خان

یوں تڑپتے ہوئے نوشادؔ وطن سے نکلے

جس طرح بلبل بیتاب چمن سے نکلے

وائے قسمت کہ ہوا دل نہ شگفتہ شب وصل

ہائے ارمان نہ اس غنچہ دہن سے نکلے

وقت رخصت میں کہوں کیا جو مرا حال ہوا

اشک جب دیدۂ احباب وطن سے نکلے

باغ میں صورت نکہت تھے ترے ہم وحشی

موسم گل ادھر آیا کہ چمن سے نکلے

فلک تفرقہ انداز نے رہنے نہ دیا

حوصلے کچھ بھی نہ یاران وطن سے نکلے

دل جو نوشادؔ لگاؤ تو کسی گل رو سے

جان نکلے تو غم غنچہ دہن سے نکلے