تقدیر شمع جلوۂ جانانہ بن گیا

تقدیر شمع جلوۂ جانانہ بن گیا

شعلہ اٹھا جو اس سے تو پردا نہ بن گیا

جو حال دل تھا کیف میں تاثیر درد تھا

وہ کہتے کہتے شوق کا افسانہ بن گیا

جنت کی آرزو سے ہے جنت کا کل وجود

ویرانہ کہہ دیا جسے ویرانہ بن گیا

یک قطرہ دل تھا مست کا پیمانۂ نصیب

ساقی نے کی نگاہ تو مے خانہ بن گیا

موقع شناس حسن محبت کے باب میں

اپنا تھا اور حشر میں بیگانہ بن گیا

اس کی طلب میں جب نہ رہا اس کا کچھ لحاظ

انداز بے قرار گدایانہ بن گیا

یوں اپنے در سے ٹال دیا اس کے ناز نے

انداز لطف خاص کریمانہ بن گیا

کیفیؔ حرم کے در پہ تھا جو کچھ وہ فیض تھا

ہاں بت کدے میں سجدۂ شکرانہ بن گیا

taqdir shama jalwa-e-janana ban gaya

shola utha jo us se to parda na ban gaya

jo hal-e-dil tha kaif mein tasir dard tha

wo kahte kahte shauq ka afsana ban gaya

jannat ki arzu se hai jannat ka kal wajud

wirana kah diya jise wirana ban gaya

yak qatra dil tha mast ka paimana-e-nasib

saqi ne ki nigah to mai khana ban gaya

mauqaa shanas husn mohabbat ke bab mein

apna tha aur hashr mein begana ban gaya

us ki talab mein jab na raha us ka kuchh lihaz

andaz-e-be qarar gadayana ban gaya

yun apne dar se tal diya us ke naz ne

andaz-e-lutf-e-khas karimana ban gaya

kaifi haram ke dar pe tha jo kuchh wo faiz tha

han but kade mein sajda-e-shukrana ban gaya