یک دو جام اور بھی دے تو ساقی

یک دو جام اور بھی دے تو ساقی

نہ رہے دل میں آرزو ساقی

میری تسکیں نہ ہوگی ساغر سے

منہ سے میرے لگا سبو ساقی

رات و دن مے کشوں کو رہتی ہے

تیری ہی یاد و جستجو ساقی

رند مفلس کو دے ہے زیاد شراب

بھائی مجھ کو تری یہ خو ساقی

آہ تجھ بن ہیں زار و نالاں ہم

بھولی مستی کی ہاو ہو ساقی

شیشۂ مے کی طرح سے ہم آج

رکھتے ہیں گریہ در گلو ساقی

کسی کے آگے مثل ساغر ہم

لاتے ہیں دست آرزو ساقی

لاتے ہیں مثل شیشۂ بادہ

تیرے ہی آگے سرفرو ساقی

رو نہیں اس کو بزم مستاں میں

جس کے تئیں تو نہ دیوے رو ساقی

دے جہاں دارؔ کو وہ مے جس کا

ہووے گل کا سا رنگ و بو ساقی

yak do jam aur bhi de to saqi

na rahe dil mein arzu saqi

meri taskin na hogi saghar se

munh se mere laga subu saqi

rat-o-din mai kashon ko rahti hai

teri hi yad-o-justuju saqi

rind-e-muflis ko de hai ziyad sharab

bhai mujh ko tiri ye khu saqi

ah tujh bin hain zar-o-nalan ham

bhuli masti ki hao ho saqi

shisha-e-mai ki tarah se ham aj

rakhte hain girya dar galo saqi

kisi ke age misl-e-saghar ham

late hain dast-e-arzu saqi

late hain misl-e-shisha-e-bada

tere hi age sarfaro saqi

ro nahin us ko bazm-e-mustan mein

jis ke tain to na dewe ro saqi

de jahan dar ko wo mai jis ka

howe gul ka sa rang-o-bu saqi