تقوے کے لئے جنت‌ و کوثر ہوئے مخصوص

تقوے کے لئے جنت‌ و کوثر ہوئے مخصوص

رندی کے لئے شیشہ و ساغر ہوئے مخصوص

پابندئ احکام شریعت ہے وہاں فرض

رندوں کو رخ ساقی و ساغر ہوئے مخصوص

قائم ہے وہاں دین بھی دنیا بھی بہ امید

ہم کو کرم رحمت‌ داور ہوئے مخصوص

شیخی ہے وہاں جبہ و دستار پہ موقوف

رندی کو یہاں ترک تن و سر ہوئے مخصوص

ہے کشف و کرامات وہاں مایۂ پندار

سودا اور زیاں ہم کو برابر ہوئے مخصوص

ہیں خرقہ‌ و عمامہ وہاں پیر طریقت

یاں کفر و صنم ہادی و رہبر ہوئے مخصوص

موقوف جو ایماں پہ رہے مسجد و منبر

ساحرؔ کو صنم خانہ و ساغر ہوئے مخصوص

taqwe ke liye jannat-o-kausar hue makhsus

rindi ke liye shisha-o-saghar hue makhsus

pabandi-e-ahkam-e-shariat hai wahan farz

rindon ko rukh saqi-o-saghar hue makhsus

qaim hai wahan din bhi duniya bhi ba ummid

ham ko karam-e-rahmat dawar hue makhsus

shekhi hai wahan jubba-o-dastar pe mauquf

rindi ko yahan tark-e-tan-o-sar hue makhsus

hai kashf-o-karamat wahan maya-e-pindar

sauda aur ziyan ham ko barabar hue makhsus

hain khirqa-o-ammama wahan pir-e-tariqat

yan kufr-o-sanam hadi-o-rahbar hue makhsus

mauquf jo iman pe rahe masjid-o-mimbar

sahir ko sanam khana-o-saghar hue makhsus