یوں تو حسین اکثر ہوتے ہیں شان والے

یوں تو حسین اکثر ہوتے ہیں شان والے

لیکن کچھ اور ہے تو او آن بان والے

ناقوس دیر پھونکوں کعبے میں یا اذان دوں

تجھ کو کہاں پکاروں او لا مکان والے

منبر پہ بیٹھ کر تو اتنا بہک نہ واعظ

کیسی یہ نیچی باتیں اونچی دکان والے

یہ حسن یہ جوانی مہماں ہے چند روزہ

اس پر نہ کر یہ غرہ او آن بان والے

کعبے کو شیخ جائے بت خانے کو برہمن

یونہی ڈٹے رہیں گے اس آستان والے

ابرو پہ ڈال کر بل ترچھی نظر نہ کر تو

یہ تیر کج پڑے گا بانکی کمان والے

غیروں پہ تو نظر ہے میری بھی کچھ خبر ہے

میں بھی مٹا ہوا ہوں او آن بان والے

تلوار کھینچ کر کیا بازو کو دیکھتا ہے

دو ہاتھ بس لگا دے اب امتحان والے

قائل ترا جہاں ہے ہاں فرق درمیاں ہے

کچھ ہیں یقین والے کچھ ہیں گمان والے

فرہاد قیس دونوں دے بیٹھے جان آخر

مرتے ہیں بات ہی پر جتنے ہیں آن والے

وہ کس لیے بلائیں جائیں حفیظؔ ہم کیوں

وہ بھی ہیں شان والے ہم بھی ہیں آن والے

yun to hasin aksar hote hain shan wale

lekin kuchh aur hai to o an ban wale

naqus der phunkun kaabe mein ya azan-e-dun

tujh ko kahan pukarun o la makan wale

mimbar pe baith kar to itna bahak na waiz

kaisi ye nichi baten unchi dukan wale

ye husn ye jawani mehman hai chand roza

us par na kar ye ghurra o an ban wale

kaabe ko shaikh jae but khane ko barahman

yunhi date rahenge is astan wale

abru pe dal kar bal tirchhi nazar na kar to

ye tir kaj parega banki kaman wale

ghairon pe to nazar hai meri bhi kuchh khabar hai

main bhi mita hua hun o an ban wale

talwar khinch kar kya bazu ko dekhta hai

do hath bas laga de ab imtihan wale

qail tira jahan hai han farq darmiyan hai

kuchh hain yaqin wale kuchh hain guman wale

farhad qais donon de baithe jan akhir

marte hain bat hi par jitne hain an wale

wo kis liye balaen jaen hafiz ham kyun

wo bhi hain shan wale ham bhi hain an wale