یوں گلشن ہستی کی مالی نے بنا ڈالی

یوں گلشن ہستی کی مالی نے بنا ڈالی

پھولوں سے جدا کلیاں کلیوں سے جدا ڈالی

سر رکھ کے ہتھیلی پر اور لخت جگر چن کر

سرکار میں لائے ہیں ارباب وفا ڈالی

رویا کہوں میں اس کو یا مژدۂ بیداری

غل ہے کہ نقاب اس نے چہرے سے اٹھا ڈالی

اللہ رے تصور کی نقاشی و نیرنگی

جب بن گئی اک صورت اک شکل مٹا ڈالی

ساقی نے ستم ڈھایا برسات میں ترسایا

جب فصل بہار آئی دوکان اٹھا ڈالی

خون دل عاشق کے اس قطرے کا کیا کہنا

دنیائے وفا جس نے رنگین بنا ڈالی

بیدمؔ ترے گریہ نے طوفان اٹھا ڈالے

اور نالوں نے دنیا کی بنیاد ہلا ڈالی

yun gulshan hasti ki mali ne bana dali

phulon se juda kaliyan kaliyon se juda dali

sar rakh ke hatheli par aur lakht-e-jigar chun kar

sarkar mein lae hain arbab-e-wafa dali

roya kahon main us ko ya muzhda-e-bedari

ghul hai ke naqab us ne chehre se utha dali

allah re tasawwur ki naqqashi-o-nairangi

jab ban gai ik surat ik shakl mita dali

saqi ne sitam dhaya barsat mein tarsaya

jab fasl-e-bahar ai dukan utha dali

khun-e-dil ashiq ke is qatre ka kya kahna

duniya-e-wafa jis ne rangin bana dali

bedam tire girya ne tufan utha dale

aur nalon ne duniya ki buniyad hila dali