یاد آتی ہے مجھے جب خوش بیانی آپ کی

یاد آتی ہے مجھے جب خوش بیانی آپ کی

کچھ نئے لفظوں میں کہتا ہوں کہانی آپ کی

آپ نے پروا نہ کی میں قید ہستی سے چھٹا

مہربانی ہو گئی نا مہربانی آپ کی

قتل کی ضد ہے نزاکت سے نہیں اٹھتی ہے تیغ

دیدنی ہے آج تو شان جوانی آپ کی

جاننے والوں سے پردہ اس قدر بیکار ہے

حسن ظاہر سب پہ اور یہ لن ترانی آپ کی

مرنے والے کر کے آنکھیں بند قبروں میں گئے

واہ وا کس شان سے آئی جوانی آپ کی

داغ الفت اس لیے سینے میں رکھا ہے نہاں

کوئی میرے پاس کیوں دیکھے نشانی آپ کی

yad ati hai mujhe jab khush bayani ap ki

kuchh nae lafzon mein kahta hun kahani ap ki

ap ne parwa na ki main qaid-e-hasti se chhuta

mehrbani ho gai na mehrbani ap ki

qatl ki zid hai nazakat se nahin uthti hai tegh

didani hai aj to shan-e-jawani ap ki

janne walon se parda is qadar bekar hai

husn zahir sab pe aur ye lan tarani ap ki

marne wale kar ke ankhen band qabron mein gae

wah wa kis shan se ai jawani ap ki

dagh-e-ulfat is liye sine mein rakha hai nihan

koi mere pas kyun dekhe nishani ap ki