یادگار گزشتگاں ہیں ہم

یادگار گزشتگاں ہیں ہم

خوب دیکھا تو پھر کہاں ہیں ہم

شمع کی طرح بزم گیتی میں

داغ بیٹھے ہیں اور رواں ہیں ہم

رہے جاتے ہیں پیچھے یاروں سے

گرد دنبال کارواں ہیں ہم

رکھ نہ خنجر کو ہاتھ سے قاتل

تیرے کشتوں میں نیم جاں ہیں ہم

آبیار سخن ہے اپنی زباں

لفظ و معنی کے باغباں ہیں ہم

تو ہی تو ہے جو خوب غور کریں

ایک دھوکا سا درمیاں ہیں ہم

دعوت تیغ کے تو قابل ہیں

گو کہ یک مشت استخواں ہیں ہم

رنگ رخ پر ہمارے، زردی سی

نظر آتی ہے، کیا خزاں ہیں ہم

گو کیا ہم کو سرد پیری نے

پر ابھی طبع میں جواں ہیں ہم

اور بھی ہم کو رہنے دے چندے

گو تری طبع پر گراں ہیں ہم

باغباں اب چمن سے جاویں کہاں

بلبل کہنہ آشیاں ہیں ہم

مصحفیؔ شاعری رہی ہے کہاں

اب تو مجلس کے روضہ خواں ہیں ہم

yadgar guzashtgan hain ham

khub dekha to phir kahan hain ham

shama ki tarah bazm-e-giti mein

dagh baithe hain aur rawan hain ham

rahe jate hain pichhe yaron se

gard dinbal karwan hain ham

rakh na khanjar ko hath se qatil

tere kishton mein nim jan hain ham

abiyar sukhan hai apni zaban

lafz-o-maani ke baghban hain ham

tu hi to hai jo khub ghaur karen

ek dhoka sa darmiyan hain ham

daawat-e-tegh ke to qabil hain

go ke yak musht-e-ustukhwan hain ham

rang-e-rukh par hamare, zardi si

nazar ati hai, kya khizan hain ham

go kiya ham ko sard piri ne

par abhi taba mein jawan hain ham

aur bhi ham ko rahne de chande

go tiri taba par giran hain ham

baghban ab chaman se jawen kahan

bulbul-e-kohna ashiyan hain ham

mushafi shayari rahi hai kahan

ab to majlis ke rauza khwan hain ham