تلاش رنگ میں آوارہ مثل بو ہوں میں

تلاش رنگ میں آوارہ مثل بو ہوں میں

گزر کے آپ سے اپنی ہی جستجو ہوں میں

نفس ہے سختیٔ قید حیات کا ضامن

نکل سکے جو نہ پھانسی سے وہ گلو ہوں میں

نشان ہستی فانی ہے داغ ناکامی

خود اپنی آنکھ سے ٹپکا ہوا لہو ہوں میں

مثال پیکر سیماب اضطراب مدام

پئے نگاہ کرم شرح آرزو ہوں میں

مری زباں پہ ہیں اندیشہ ہائے ناکامی

سمجھ رہے وہ دل میں کہ حیلہ جو ہوں میں

ابھی ہے آب ندامت سر جبیں باقی

نماز ایسے میں پڑھ لوں کہ با وضو ہوں میں

ہوں کچھ نہ ہونے پہ بھی کائنات کا حاصل

کہ اپنا شوق نہیں تیری آرزو ہوں میں

مثال معنیٔ بے لفظ و لفظ بے معنی

جو تیرے دل میں نہیں ہے وہ آرزوؔ ہوں میں

talash rang mein awara misl-e-bu hun main

guzar ke ap se apni hi justuju hun main

nafas hai sakhti-e-qaid-e-hayat ka zamin

nikal sake jo na phansi se wo galo hun main

nishan-e-hasti-e-fani hai dagh nakami

khud apni ankh se tapka hua lahu hun main

misal-e-paikar-e-simab iztirab-e-mudam

piye nigah-e-karam sharh-e-arzu hun main

miri zaban pe hain andesha hae nakami

samajh rahe wo dil mein ke hila jo hun main

abhi hai ab nadamat sar jabin baqi

namaz aise mein parh lun ke ba wuzu hun main

hun kuchh na hone pe bhi kainat ka hasil

ke apna shauq nahin teri arzu hun main

misal-e-maani-e-be lafz-o-lafz-e-be maani

jo tere dil mein nahin hai wo arzu hun main