یاد میں تیری جہاں کو بھولتا جاتا ہوں میں

یاد میں تیری جہاں کو بھولتا جاتا ہوں میں

بھولنے والے کبھی تجھ کو بھی یاد آتا ہوں میں

ایک دھندلا سا تصور ہے کہ دل بھی تھا یہاں

اب تو سینے میں فقط اک ٹیس سی پاتا ہوں میں

او وفا نا آشنا کب تک سنوں تیرا گلہ

بے وفا کہتے ہیں تجھ کو اور شرماتا ہوں میں

آرزوؤں کا شباب اور مرگ حسرت ہائے ہائے

جب بہار آئے گلستاں میں تو مرجھاتا ہوں میں

حشرؔ میری شعر گوئی ہے فقط فریاد شوق

اپنا غم دل کی زباں میں دل کو سمجھاتا ہوں میں

yad mein teri jahan ko bhulta jata hun main

bhulne wale kabhi tujh ko bhi yad ata hun main

ek dhundla sa tasawwur hai ke dil bhi tha yahan

ab to sine mein faqat ik tis si pata hun main

o wafa na ashna kab tak sunun tera gila

be wafa kahte hain tujh ko aur sharmata hun main

arzuon ka shabab aur marg hasrat hae hae

jab bahar ae gulistan mein to murjhata hun main

hashr meri sher goi hai faqat fariyad shauq

apna gham dil ki zaban mein dil ko samjhata hun main