یاد ایام کہ ہم رتبۂ رضواں ہم تھے

یاد ایام کہ ہم رتبۂ رضواں ہم تھے

باغبان چمن محفل جاناں ہم تھے

قابل قتل نہ اے لشکر مژگاں ہم تھے

دل کی اجڑی ہوئی بستی کے نگہباں ہم تھے

دھجیاں جیب کی ہاتھوں میں ہیں آج اے وحشت

جامہ زیبوں سے کبھی دست و گریباں ہم تھے

جان لی گیسوؤں نے الفت رخ میں آخر

کافروں نے ہمیں مارا کہ مسلماں ہم تھے

غیر کے گھر کی طرف کے جو اٹھے تھے پردے

عطر بالوں میں وہ ملتے تھے پریشاں ہم تھے

قفس تنگ میں گھٹ گھٹ کے نہ مرتے کیوں کر

ناز پروردۂ آغوش گلستاں ہم تھے

روح تڑپی ہے پئے لالۂ صحرا کیا کیا

فصل گل جوش پہ تھی قیدئ زنداں ہم تھے

دل کے دینے میں تأمل ہمیں ہوتا کیوں کر

یہ حسینوں کی امانت تھی نگہباں ہم تھے

آج تھی شب کو بہت داغ جگر میں سوزش

کہتی تھی ان کی ملاحت نمک افشاں ہم تھے

شعلۂ حسن سے تھا دود دل اپنا اول

آگ دنیا میں نہ آئی تھی کہ سوزاں ہم تھے

ہر طرف دہر میں تھا زلف کی زنجیر کا گل

مگر اے جوش جنوں سلسلہ جنباں ہم تھے

قافلے رات کو آتے تھے ادھر جان کے آگ

دشت غربت میں جدھر اے دل سوزاں ہم تھے

کہتے ہیں عارض محبوب کہ تھی رات جو گرم

چاند پر اوس پڑی تھی عرق افشاں ہم تھے

طوق منت کے گلے میں تھے وہ دن یاد کرو

تم پر اس عہد میں بھی چاک گریباں ہم تھے

دیتے پھرتے تھے حسینوں کی گلی میں آواز

کبھی آئینہ فروش دل حیراں ہم تھے

ڈوب جاتے ہیں جو رہ رہ کے تعشقؔ تارے

مثل ابر آخر شب وصل میں گریاں ہم تھے

yad-e-ayyam ke ham rutba-e-rizwan ham the

baghban-e-chaman mahfil janan ham the

qabil-e-qatl na ai lashkar-e-mizhgan ham the

dil ki ujri hui basti ke nigahban ham the

dhajjiyan jeb ki hathon mein hain aj ai wahshat

jama zebon se kabhi dast-o-gareban ham the

jan li gesuon ne ulfat rukh mein akhir

kafiron ne hamen mara ke musalman ham the

ghair ke ghar ki taraf ke jo uthe the parde

itr balon mein wo milte the pareshan ham the

qafas-e-tang mein ghut ghut ke na marte kyun kar

naz parwarda-e-aghosh-e-gulistan ham the

ruh tarpi hai piye lala-e-sahra kya kiya

fasl-e-gul josh pe thi qaidi-e-zindan ham the

dil ke dene mein tamal hamen hota kyun kar

ye hasinon ki amanat thi nigahban ham the

aj thi shab ko bahut dagh-e-jigar mein sozish

kahti thi un ki malahat namak afshan ham the

shola-e-husn se tha dud-e-dil apna awwal

ag duniya mein na ai thi ke sozan ham the

har taraf dahr mein tha zulf ki zanjir ka gul

magar ai josh-e-junun silsila jumban ham the

qafile rat ko ate the idhar jan ke ag

dasht-e-ghurbat mein jidhar ai dil-e-sozan ham the

kahte hain ariz mahbub ke thi rat jo garm

chand par os pari thi araq afshan ham the

tauq minnat ke gale mein the wo din yad karo

tum par is ahd mein bhi chak-e-gareban ham the

dete phirte the hasinon ki gali mein awaz

kabhi aina farosh-e-dil-e-hairan ham the

dub jate hain jo rah rah ke taashshuq tare

misl-e-abr akhir-e-shab wasl mein giryan ham the