یاد

آئی جب ان کی یاد تو آتی چلی گئی

ہر نقش ماسوا کو مٹاتی چلی گئی

ہر منظر جمال دکھاتی چلی گئی

جیسے انہیں کو سامنے لاتی چلی گئی

ہر واقعہ قریب تر آتا چلا گیا

ہر شے حسین تر نظر آتی چلی گئی

ویرانۂ حیات کے ایک ایک گوشہ میں

جوگن کوئی ستار بجاتی چلی گئی

دل پھنک رہا تھا آتش ضبط فراق سے

دیپک کو مے گسار بناتی چلی گئی

بے حرف و بے حکایت و بے ساز و بے صدا

رگ رگ میں نغمہ بن کے سماتی چلی گئی

جتنا ہی کچھ سکون سا آتا چلا گیا

اتنا ہی بے قرار بناتی چلی گئی

کیفیتوں کو ہوش سا آتا چلا گیا

بے کیفیوں کو نیند سی آتی چلی گئی

کیا کیا نہ حسن یار سے شکوے تھے عشق کو

کیا کیا نہ شرمسار بناتی چلی گئی

تفریق حسن و عشق کا جھگڑا نہیں رہا

تمئیز قرب و بعد مٹاتی چلی گئی

میں تشنہ کام شوق تھا پیتا چلا گیا

وہ مست انکھڑیوں سے پلاتی چلی گئی

اک حسن بے جہت کی فضائے بسیط میں

اڑتی گئی مجھے بھی اڑاتی چلی گئی

پھر میں ہوں اور عشق کی بیتابیاں جگرؔ

اچھا ہوا وہ نیند کی ماتی چلی گئی

ai jab un ki yad to ati chali gai

har naqsh-e-masiwa ko mitati chali gai

har manzar-e-jamal dikhati chali gai

jaise unhen ko samne lati chali gai

har waqia qarib tar ata chala gaya

har shai hasin tar nazar ati chali gai

wirana-e-hayat ke ek ek gosha mein

jogan koi sitar bajati chali gai

dil phink raha tha atish zabt-e-firaq se

dipak ko mai gusar banati chali gai

be harf-o-be hikayat-o-be saz-o-be sada

rag rag mein naghma ban ke samiti chali gai

jitna hi kuchh sukun sa ata chala gaya

itna hi be qarar banati chali gai

kaifiyaton ko hosh sa ata chala gaya

be kaifiyon ko nind si ati chali gai

kya kya na husn-e-yar se shikwe the ishq ko

kya kya na sharmsar banati chali gai

tafriq-e-husn-o-ishq ka jhagra nahin raha

tamiz-e-qurb-o-baad mitati chali gai

main tishna kam shauq tha pita chala gaya

wo mast ankhriyon se pilati chali gai

ik husn-e-be jihat ki faza-e-basit mein

urti gai mujhe bhi urati chali gai

phir main hun aur ishq ki betabiyan jigar

achchha hua wo nind ki mati chali gai