یار اٹھ گئے دنیا سے اغیار کی باری ہے

یار اٹھ گئے دنیا سے اغیار کی باری ہے

گل سیر چمن کر گئے اب خار کی باری ہے

زاہد نے عبادت چھوڑ اس زلف سے الجھا ہے

تسبیح کی شیخی گئی زنار کی باری ہے

اس کاکل مشکیں کی بو ہوئی ہے پریشاں آ

سب شہر ختن لٹ گئے تاتار کی باری ہے

گلشن میں خراماں ہو اب برقعہ اٹھایا ہے

سب گر گیا سروستاں گل زار کی باری ہے

کر زخمی نگاہوں سے اب دل پہ اٹھایا ہاتھ

نیزوں کی گئی نوبت تروار کی باری ہے

دل پر ہیں جہاں کے سب باہم کی کدورت سے

آئینوں کی صافی گئی زنگار کی باری ہے

جھڑ گئے وہ تبسم سے گل غنچے کھڑے ہیں سرو

تمکیں نے چمن لوٹا رفتار کی باری ہے

ان زلفوں کے عقرب نے دل میرا ڈسا عزلتؔ

پیچھے پڑی ہے چوٹی اب مار کی باری ہے

yar uth gae duniya se aghyar ki bari hai

gul sair-e-chaman kar gae ab khar ki bari hai

zahid ne ibadat chhor is zulf se uljha hai

tasbih ki shekhi gai zunnar ki bari hai

is kakul-e-mushkin ki bu hui hai pareshan a

sab shahr-e-khutan lut gae tatar ki bari hai

gulshan mein khiraman ho ab barqaaa uthaya hai

sab gir gaya sarwsitan gul zar ki bari hai

kar zakhmi nigahon se ab dil pe uthaya hath

nezon ki gai naubat tarwar ki bari hai

dil par hain jahan ke sab baham ki kudurat se

ainon ki safi gai zangar ki bari hai

jhar gae wo tabassum se gul ghunche khare hain sarw

tamkin ne chaman lauta raftar ki bari hai

in zulfon ke aqrab ne dil mera dasa uzlat

pichhe pari hai choti ab mar ki bari hai