ہے دل کو اس طرح سے مرے یار کی تلاش

ہے دل کو اس طرح سے مرے یار کی تلاش

جس طرح تھی کلیم کو دیدار کی تلاش

ہوں رند سر کھلا بھی جو ہووے تو ڈر نہیں

زاہد نہیں کہ مجھ کو ہو دستار کی تلاش

میں ہوں کہیں پہ آٹھوں پہر ہے اسی کی فکر

جاتی نہیں ہے دل سے مرے یار کی تلاش

دل ہاتھوں ہاتھ بک گیا بازار عشق میں

کرنی پڑی نہ مجھ کو خریدار کی تلاش

اپنے ہی دل میں ڈھونڈھنا لازم تھا یار کو

اتنے دنوں جو کی بھی تو بے کار کی تلاش

بیعانہ نقد جاں کرو سیاحؔ پیش کش

رہتی ہے ان کو ایسے خریدار کی تلاش

hai dil ko is tarah se mire yar ki talash

jis tarah thi kalim ko didar ki talash

hun rind sar khula bhi jo howe to dar nahin

zahid nahin ke mujh ko ho dastar ki talash

main hun kahin pe athon pahar hai usi ki fikr

jati nahin hai dil se mire yar ki talash

dil hathon hath bik gaya bazar-e-ishq mein

karni pari na mujh ko kharidar ki talash

apne hi dil mein dhundhna lazim tha yar ko

itne dinon jo ki bhi to be kar ki talash

baiana naqd-e-jan karo sayyah pesh kash

rahti hai un ko aise kharidar ki talash