ہے دل کو یوں ترے دمِ اعجاز اثر سے فیض

ہے دل کو یوں ترے دمِ اعجاز اثر سے فیض

غنچے کو جیسے موجۂ بادِ سحر سے فیض

عشاق سے نگاہ نہ رکھو دریغ تم

پاتے ہیں لوگ خدمتِ اہلِ نظر سے فیض

ہے عالمِ کبیر میں بھی یوں ہی جس طرح

دل سے جگر کو فیض ہے، دل کو جگر سے فیض

آزردہ جفائے “دے” و “تیر” کو نہیں

یک ذرہ آب و آتشِ لعل و گہر سے فیض

اپنی نہاد میں نہیں احساں فرامشی

پایا ہے ہم نے صاعقے کا ابرِ تر سے فیض

زر کسب کر کہ عشرتِ خسرو نصیب ہو

فرہاد کو سنا ہے، ہوا جو ہنر سے فیض؟

لگتے ہیں اس کے سینہ و بر سے مدام ہم

ہوتا ہے ہم کو روز مہِ سیم بر سے فیض

اربابِ خانقاہ ہیں محتاجِ اغنیا

کافی ہے ہم کو پیرِ مغاں! تیرے در سے فیض

بلبل ہمارے گھر وہ خود آتے ہیں رحم سے

افزوں ہے بے پری میں یہاں بال و پر سے فیض

خرم نہادِ مے کش و زاہد شگفتہ دل

ہے شیفتہ ہر ایک کو وقتِ سحر سے فیض

hai dil ko yun tire dam-e-ejaz asar se faiz

ghunche ko jaise mauja-e-bad-e-sahar se faiz

ushshaq se nigah na rakho daregh tum

pate hain log khidmat-e-ahl-e-nazar se faiz

hai alam-e-kabir mein bhi yun hi jis tarah

dil se jigar ko faiz hai, dil ko jigar se faiz

azurda jafae "de" o "tir" ko nahin

yak zarra ab-o-atish-e-laal-o-guhar se faiz

apni nihad mein nahin ehsan faramshi

paya hai ham ne saiqe ka abr-e-tar se faiz

zar kasb kar ke ishrat-e-khusrau nasib ho

farhad ko suna hai, hawa jo hunar se faiz?

lagte hain us ke sina-o-bar se mudam ham

hota hai ham ko roz mah-e-sim bar se faiz

arbab-e-khanqah hain mohtaj-e-aghniya

kafi hai ham ko pir-e-mughan! tere dar se faiz

bulbul hamare ghar wo khud ate hain rahm se

afzun hai be pari mein yahan bal-o-par se faiz

khurram nihad-e-mai kash-o-zahid shagufta dil

hai shefta har ek ko waqt-e-sahar se faiz