ہے خموشی ظلم چرخ دیو پیکر کا جواب

ہے خموشی ظلم چرخ دیو پیکر کا جواب

آدمی ہوتا تو ہم دیتے برابر کا جواب

جو بگولا دشت غربت میں اٹھا سمجھا یہ میں

کرتی ہے تعمیر دیوانی مرے گھر کا جواب

ساتھ خنجر کے چلے گی وقت ذبح اپنی زبان

جان دینے والے دیتے ہیں برابر کا جواب

سجدہ کرتا ہوں جو میں ٹھوکر لگاتا ہے وہ بت

پاؤں اس کا بڑھ کے دیتا ہے مرے سر کا جواب

ابر کے ٹکڑے نہ الجھیں میری موج اشک سے

خشک مغزوں سے ہے مشکل مصرعۂ تر کا جواب

وہ کھنچا تھا میں بھی کھنچ رہتا تو بنتی کس طرح

سر جھکا دیتا تھا قاتل تیرے خنجر کا جواب

جیتے جی ممکن نہیں اس شوخ کا خط دیکھنا

بعد میرے آئے گا میرے مقدر کا جواب

شیخ کہتا ہے برہمن کو برہمن اس کو سخت

کعبہ و بت خانہ میں پتھر ہے پتھر کا جواب

روز دکھلاتا ہے گردوں کیسی کیسی صورتیں

بت تراشی میں ہے یہ کافر بھی آذر کا جواب

ہر جگہ قبر گدا تکیے میں ہر جا گور شاہ

ایک گھر اس شہر میں ہے دوسرے گھر کا جواب

جلوہ گر ہے نور حق ہونے سے یکتائی امیرؔ

سایہ بھی ہوتا اگر ہوتا پیمبر کا جواب

hai khamoshi zulm-e-charkh-e-dew-e-paikar ka jawab

admi hota to ham dete barabar ka jawab

jo bagula dasht-e-ghurbat mein utha samjha ye main

karti hai taamir diwani mire ghar ka jawab

sath khanjar ke chalegi waqt-e-zabh apni zaban

jan dene wale dete hain barabar ka jawab

sajda karta hun jo main thokar lagata hai wo but

paon is ka barh ke deta hai mire sar ka jawab

abr ke tukre na uljhen meri mauj-e-ashk se

khushk maghzon se hai mushkil misra-e-tar ka jawab

wo khincha tha main bhi khinch rahta to banti kis tarah

sar jhuka deta tha qatil tere khanjar ka jawab

jite ji mumkin nahin us shokh ka khat dekhna

baad mere aega mere muqaddar ka jawab

shaikh kahta hai barahman ko barahman us ko sakht

kaaba-o-but khana mein patthar hai patthar ka jawab

roz dikhlata hai gardun kaisi kaisi suraten

but tarashi mein hai ye kafir bhi azar ka jawab

har jagah qabr-e-gada takiye mein har ja gor shah

ek ghar is shahr mein hai dusre ghar ka jawab

jalwa gar hai nur-e-haq hone se yaktai amir

saya bhi hota agar hota payambar ka jawab