ہوں وہ مومن جسے ایماں سے سروکار نہیں — شاہ اکبر داناپوری

Arooz is now on the App Store, for iPhone and iPad. Download →

شاہ اکبر داناپوری

ہوں وہ مومن جسے ایماں سے سروکار نہیں

وہ برہمن ہوں جسے حاجت زنار نہیں

گنگ وہ کان جو وقف سخن یار نہیں

کور وہ آنکھ جسے حسرت دیدار نہیں

کفر سے کام نہ ایمان سے مطلب ہے ہمیں

دونوں عالم سے بجز تیرے سروکار نہیں

کیا خبردار کرے گا تو ہمیں او زاہد

آپ تو اپنی حقیقت سے خبردار نہیں

کب ترے جلوۂ دیدار نے حیران کیا

کون سا دن ہے کہ ہم نقش بہ دیوار نہیں

سرفروشی صفت کوہ کن آخر میں ہے

عشق پہلے تو بہت سہل ہے دشوار نہیں

دہن گور سے آتی ہے صدا میت کو

آج ہمدم نہیں تیرا کوئی غم خوار نہیں

دیکھ کر اس کو یہ ہوں محو برنگ تصویر

ہے زباں منہ میں مگر طاقت گفتار نہیں

چشم دل کھول اگر ہے طلب دید اکبرؔ

نظر آئے گا ان آنکھوں سے وہ دیدار نہیں