ہوں دفن مر کے کوچۂ جاناں کے سامنے
منشی شیو پرشاد وہبیہوں دفن مر کے کوچۂ جاناں کے سامنے
بلبل کا آشیاں ہو گلستاں کے سامنے
شرمائے اشک خوں سے گل تر بہار میں
رنگ چمن اڑا مرے داماں کے سامنے
قمری کو پا بہ گل نظر آتا ہے شرم سے
شمشاد میرے سرو خراماں کے سامنے
گر خط سبز لب پہ ترے خضر دیکھ پائے
پھر منہ کرے نہ چشمۂ حیواں کے سامنے
نظروں میں جوہری کے خذف ریزے بن گئے
لعل جگر ترے لب و دنداں کے سامنے
دیکھے جو اس پری سے مجھے گرم اختلاط
بلقیس منہ کرے نہ سلیماں کے سامنے
موسیٰ نہیں جو آنکھ جھپک جائے گی مری
آئیں حضور دیدۂ حیراں کے سامنے
روتے ہیں ہم ادھر وہ ادھر سنتے ہیں کھڑے
بجلی چمک رہی ہے یہ باراں کے سامنے
صدقے وہ سر کے ہوگا ابھی کیسی ہمسری
کھولو تو بال سنبل پیچاں کے سامنے
گھنڈی پہ ہو قبا کے نثار اختر فلک
سجدے کرے ہلال گریباں کے سامنے
آگے مرے رقیب کو دیتے ہو گالیاں
فقرے یہ کیجئے کسی ناداں کے سامنے
اے گل چمن میں بات کی بلبل کو کیا مجال
غنچے نہ کھولیں منہ لب خنداں کے سامنے
موسیٰ کی طرح تم کو بھی آئے نہ غش کہیں
وہبیؔ نہ جاؤ عارض تاباں کے سامنے
hun dafn mar ke kucha-e-janan ke samne
bulbul ka ashiyan ho gulistan ke samne
sharmae ashk-e-khun se gul-e-tar bahar mein
rang-e-chaman ura mire daman ke samne
qumri ko pa ba gul nazar ata hai sharm se
shamshad mere sarw khiraman ke samne
gar khat-e-sabz lab pe tire khizr dekh pae
phir munh kare na chashma-e-haiwan ke samne
nazron mein jauhari ke khazaf reze ban gae
laal-e-jigar tire lab-o-dandan ke samne
dekhe jo us pari se mujhe garm-e-ikhtilat
balqais-e-munh kare na sulaiman ke samne
musa nahin jo ankh jhapak jaegi miri
aen huzur dida-e-hairan ke samne
rote hain ham idhar wo idhar sunte hain khare
bijli chamak rahi hai ye baran ke samne
sadqe wo sar ke hoga abhi kaisi hamsiri
kholo to bal sumbul-e-pechan ke samne
ghindi pe ho qaba ke nisar akhtar-e-falak
sajde kare hilal gareban ke samne
age mire raqib ko dete ho galiyan
fiqre ye kijiye kisi nadan ke samne
ai gul chaman mein bat ki bulbul ko kya majal
ghunche na kholen munh lab-e-khandan ke samne
musa ki tarah tum ko bhi ae na ghash kahin
wobi na jao ariz-e-taban ke samne