ہیں بعد مرے مرگ کے آثار سے اب تک

ہیں بعد مرے مرگ کے آثار سے اب تک

سوکھا نہیں لوہو در و دیوار سے اب تک

رنگینیٔ عشق اس کے ملے پر ہوئی معلوم

صحبت نہ ہوئی تھی کسی خونخوار سے اب تک

کب سے متحمل ہے جفاؤں کا دل زار

زنہار وفا ہو نہ سکی یار سے اب تک

ابرو ہی کی جنبش نے یہ ستھراؤ کیے ہیں

مارا نہیں ان نے کوئی تلوار سے اب تک

وعدہ بھی قیامت کا بھلا کوئی ہے وعدہ

پر دل نہیں خالی غم دیدار سے اب تک

مدت ہوئی گھٹ گھٹ کے ہمیں شہر میں مرتے

واقف نہ ہوا کوئی اس اسرار سے اب تک

برسوں ہوئے دل سوختہ بلبل کو موئے لیک

اک دود سا اٹھتا ہے چمن زار سے اب تک

کیا جانیے ہوتے ہیں سخن لطف کے کیسے

پوچھا نہیں ان نے تو ہمیں پیار سے اب تک

اس باغ میں اغلب ہے کہ سرزد نہ ہوا ہو

یوں نالہ کسو مرغ گرفتار سے اب تک

خط آئے پہ بھی دن ہے سیہ تم سے ہمارا

جاتا نہیں اندھیر یہ سرکار سے اب تک

نکلا تھا کہیں وہ گل نازک شب مہ میں

سو کوفت نہیں جاتی ہے رخسار سے اب تک

دیکھا تھا کہیں سایہ ترے قد کا چمن میں

ہیں میرؔ جی آوارہ پری دار سے اب تک

hain baad mire marg ke asar se ab tak

sukha nahin lohu dar-o-diwar se ab tak

rangini-e-ishq us ke mile par hui maalum

sohbat na hui thi kisi khunkhwar se ab tak

kab se mutahammil hai jafaon ka dil-e-zar

zinhar wafa ho na saki yar se ab tak

abru hi ki jumbish ne ye sathrao kiye hain

mara nahin un ne koi talwar se ab tak

waada bhi qayamat ka bhala koi hai waada

par dil nahin khali gham didar se ab tak

muddat hui ghut ghut ke hamen shahr mein marte

waqif na hua koi is asrar se ab tak

barson hue dil sokhta bulbul ko mu-e-lek

ik dud sa uthta hai chaman zar se ab tak

kya janiye hote hain sukhan lutf ke kaise

puchha nahin un ne to hamen pyar se ab tak

is bagh mein aghlab hai ke sarzad na hua ho

yun nala kisu murgh-e-giraftar se ab tak

khat ae pe bhi din hai siyah tum se hamara

jata nahin andher ye sarkar se ab tak

nikla tha kahin wo gul-e-nazuk shab mah mein

so koft nahin jati hai rukhsar se ab tak

dekha tha kahin saya tire qad ka chaman mein

hain mir ji awara pari dar se ab tak