ہیں جلوۂ تن سے در و دیوار بسنتی

ہیں جلوۂ تن سے در و دیوار بسنتی

پوشاک جو پہنے ہے مرا یار بسنتی

کیا فصل بہاری نے شگوفے ہیں کھلائے

معشوق ہیں پھرتے سر بازار بسنتی

گیندا ہے کھلا باغ میں میدان میں سرسوں

صحرا وہ بسنتی ہے یہ گل زار بسنتی

اس رشک مسیحا کا جو ہو جائے اشارہ

آنکھوں سے بنے نرگس بیمار بسنتی

گیندوں کے درختوں میں نمایاں نہیں گیندے

ہر شاخ کے سر پر ہے یہ دستار بسنتی

منہ زرد دوپٹے کے نہ آنچل سے چھپاؤ

ہو جائے نہ رنگ گل رخسار بسنتی

کھلتی ہے مرے شوخ پہ ہر رنگ کی پوشاک

اودی، اگری، چمپئی، گلنار، بسنتی

ہے لطف حسینوں کی دو رنگی کا امانتؔ

دو چار گلابی ہوں تو دو چار بسنتی

hain jalwa-e-tan se dar-o-diwar basanti

poshak jo pahne hai mira yar basanti

kya fasl-e-bahari ne shagufe hain khilae

maashuq hain phirte sar-e-bazar basanti

genda hai khula bagh mein maidan mein sarson

sahra wo basanti hai ye gul zar basanti

is rashk-e-masiha ka jo ho jae ishara

ankhon se bane nargis-e-bimar basanti

gendon ke darakhton mein numayan nahin gende

har shakh ke sar par hai ye dastar-e-basanti

munh zard dupatte ke na anchal se chhupao

ho jae na rang-e-gul rukhsar basanti

khulti hai mire shokh pe har rang ki poshak

audi, ugri, champai, gulnar, basanti

hai lutf hasinon ki do rangi ka amanat

do char gulabi hun to do char basanti