ہے آئینہ خانے میں ترا ذوق فزا رقص

ہے آئینہ خانے میں ترا ذوق فزا رقص

کرتے ہیں بہت سے ترے ہم شکل جدا رقص

بے زخم صدا دینے لگے ساز عجب کیا

گر کرنے لگیں خود بخود آلات غنا رقص

ہو گر نہ تری باغ میں آنے کی توقع

کیوں سرو کو تعلیم کرے باد صبا رقص

واں قافلہ منزل پہ بھی پہنچا مگر اب تک

ہم کرتے ہیں صحرا میں با آواز درا رقص

ہے وادئ غم وہ کہ گر آ جائیں ادھر خضر

رعشے سے کرے ہاتھ میں حضرت کے عصا رقص

معقول سہی وجد کا حیلہ مگر اے شیخ

اچھا نہیں با ایں ہمہ تمکیں‌ و حیا رقص

یوں ہی تو خرابات میں آؤ کہ سراسر

یا بادہ ہے یا بنگ ہے یا نغمہ ہے یا رقص

یاں تم کو یہ آواز دف و چنگ مبارک

بے کشمکش خرقہ و تسبیح و ردا رقص

ناظمؔ ترے اشعار میں ہیں معنیٔ توحید

اس زمزمے پر کرتے ہیں مردان خدا رقص

hai aina khane mein tira zauq-e-faza raqs

karte hain bahut se tire ham shakl juda raqs

be zakhm sada dene lage saz ajab kya

gar karne lagen khud bakhud alat-e-ghina raqs

ho gar na tiri bagh mein ane ki tawaqqo

kyun sarw ko taalim kare bad-e-saba raqs

wan qafila manzil pe bhi pahuncha magar ab tak

ham karte hain sahra mein ba awaz dara raqs

hai wadi-e-gham wo ke gar a jaen idhar khizr

raashe se kare hath mein hazrat ke asa raqs

maaqul sahi wajd ka hila magar ai shaikh

achchha nahin ba ain hama tamkin-o-haya raqs

yun hi to kharabat mein ao ke sarasar

ya bada hai ya bang hai ya naghma hai ya raqs

yan tum ko ye awaz daf-o-chang mubarak

be kashmakash-e-khirqa-o-tasbih-o-rida raqs

nazim tire ashar mein hain maani-e-tauhid

is zamzame par karte hain mardan-e-khuda raqs