ہیں اشک مری آنکھوں میں قلزم سے زیادہ

ہیں اشک مری آنکھوں میں قلزم سے زیادہ

ہیں داغ مرے سینے میں انجم سے زیادہ

سو رمز کی کرتا ہے اشارے میں وہ باتیں

ہے لطف خموشی میں تکلم سے زیادہ

جز صبر دلا چارہ نہیں عشق بتاں میں

کرتے ہیں یہ ظلم اور تظلم سے زیادہ

مے خانے میں سو مرتبہ میں مر کے جیا ہوں

ہے قلقل مینا مجھے قم قم سے زیادہ

سو رقص سے افزوں ہے پری رو تری رفتار

پاؤں کی صدا لاکھ ترنم سے زیادہ

تکلیف تکلف سے کیا عشق نے آزاد

موئے سر شوریدہ ہیں قاقم سے زیادہ

معشوقوں سے امید وفا رکھتے ہو ناسخؔ

ناداں کوئی دنیا میں نہیں تم سے زیادہ

hain ashk miri ankhon mein qulzum se ziyada

hain dagh mire sine mein anjum se ziyada

so ramz ki karta hai ishare mein wo baten

hai lutf-e-khamoshi mein takallum se ziyada

juz sabr dila chara nahin ishq-e-butan mein

karte hain ye zulm aur tazallum se ziyada

mai khane mein so martaba mein mar ke jiya hun

hai qulqul-e-mina mujhe qum qum se ziyada

so raqs se afzun hai pari ru tiri raftar

paon ki sada lakh tarannum se ziyada

taklif-e-takalluf se kiya ishq ne azad

mu-e-sar-e-shorida hain qaqum se ziyada

maashuqon se ummid-e-wafa rakhte ho nasikh

nadan koi duniya mein nahin tum se ziyada