ہوتی ہے طبیعت ہی خدا داد کسی کی

ہوتی ہے طبیعت ہی خدا داد کسی کی

الفت میں وفائیں نہیں ایجاد کسی کی

ناکام پھری عرش سے فریاد کسی کی

کس در سے امیدیں ہوئیں برباد کسی کی

اللہ رے پابندیٔ آداب محبت

فریاد بھی گویا نہیں آزاد کسی کی

آ اے غم دوراں تجھے سینہ سے لگا لوں

بھولے سے بھی آتی نہیں اب یاد کسی کی

عنوان محبت ہے نگاہ غلط انداز

مستغنیٔ تمہید ہے روداد کسی کی

مٹتے ہوئے اس طرح کسی کو نہیں دیکھا

جس طرح سے ہستی ہوئی برباد کسی کی

افسانۂ فرہاد کی تمہید اٹھائی

ہم راز مگر کہہ گیا روداد کسی کی

گستاخ تمناؤں نے کیا چھیڑ دیا ہے

شرمائی ہوئی دل میں ہے کیوں یاد کسی کی

کس درد بھرے دل کی منیرؔ آہ صدا ہے

اک پیکر بیتاب ہے فریاد کسی کی

hoti hai tabiat hi khuda dad kisi ki

ulfat mein wafaen nahin ijad kisi ki

nakam phiri arsh se fariyad kisi ki

kis dar se ummiden huin barbad kisi ki

allah re pabandi-e-adab-e-mohabbat

fariyad bhi goya nahin azad kisi ki

a ai gham-e-dauran tujhe sina se laga lun

bhule se bhi ati nahin ab yad kisi ki

unwan-e-mohabbat hai nigah-e-ghalat andaz

mustaghni-e-tamhid hai rudad kisi ki

mitte hue is tarah kisi ko nahin dekha

jis tarah se hasti hui barbad kisi ki

afsana-e-farhad ki tamhid uthai

ham raz magar kah gaya rudad kisi ki

gustakh tamannaon ne kiya chher diya hai

sharmai hui dil mein hai kyun yad kisi ki

kis dard bhare dil ki munir ah sada hai

ik paikar-e-betab hai fariyad kisi ki