ہوش و شکیب و تاب و صبر و قرار پانچوں

ہوش و شکیب و تاب و صبر و قرار پانچوں

قربان کر چکا ہوں میں تجھ پہ یار پانچوں

اک درد ہجر سے بس یہ پانچ عارضے ہیں

بے ہوشی بے قراری غش تپ بخار پانچوں

مطرب پسر کے غم میں بھاتے ہیں کس کے دل کو

گوری ایمن البّا دیس اور ملار پانچوں

ایمان و دین و مال و دل اور نقد جاں بھی

میں کر چکا ہوں پیارے تجھ پر نثار پانچوں

گر تو قسم بھی کھائے جھوٹے ہیں میرے پیارے

پیمان و عہد و وعدہ قول و قرار پانچوں

کرتے ہیں قتل عالم ظالم یہ عضو تیرے

مژگان و چشم و ابرو زلف و عذار پانچوں

کہسار و دشت و دریا گل زار و بزم عشرت

ہیں خار ساں نظر میں بے روئے یار پانچوں

اس طرح میں غزل کا لکھنا ہے غیرممکن

اے سحرؔ کوئی باندھے گو اب ہزار پانچوں

hosh-o-shakeb-o-tab-o-sabr-o-qarar panchon

qurban kar chuka hun main tujh pe yar panchon

ik dard-e-hijr se bas ye panch arze hain

be hoshi be qarari ghash tap bukhar panchon

mutrib pisar ke gham mein bhate hain kis ke dil ko

gori eman alba des aur malar panchon

iman-o-din-o-mal-o-dil aur naqd-e-jan bhi

main kar chuka hun pyare tujh par nisar panchon

gar to qasam bhi khae jhute hain mere pyare

paiman-o-ahd-o-waada qaul-o-qarar panchon

karte hain qatl alam zalim ye uzw tere

mizhgan-o-chashm-o-abru zulf-o-izar panchon

kohsar-o-dasht-o-dariya gul zar-o-bazm-e-ishrat

hain khar san nazar mein be ru-e-yar panchon

is tarah main ghazal ka likhna hai ghairmumkin

ai sehr koi bandhe go ab hazar panchon