ہوس گل زار کی مثل عنادل ہم بھی رکھتے تھے

ہوس گل زار کی مثل عنادل ہم بھی رکھتے تھے

کبھی تھا شوق گل ہم کو کبھی دل ہم بھی رکھتے تھے

قضا بھی تیرے ہاتھوں چاہتے تھے تجھ کو کیا کیجے

نہیں تو تیغ دم کے ساتھ قاتل ہم بھی رکھتے تھے

خطائے عشق پر ہم پر نہ اتنا بھی ستم ڈھاؤ

اگر چاہا تو چاہا کیا ہوا دل ہم بھی رکھتے تھے

خدا کو علم ہے زندہ ہے یا جل بھن گیا شب کو

دل اپنا تیرے پروانوں میں شامل ہم بھی رکھتے تھے

مری جاں بازیوں پر گور میں رستم یہ کہتا ہے

نہ تھے ایسے جری گو شیر کا دل ہم بھی رکھتے تھے

علاقہ عشق کا لیتے یہ سوچے ہوں گے بربادی

وگرنہ نقد جان و سکۂ دل ہم بھی رکھتے تھے

خدا کے سامنے ہوگی جو پرسش عشق بازوں کی

کہیں گے ہم بھی اتنا عشق کامل ہم بھی رکھتے تھے

تمنا تھی ہمیں بھی تیری صحبت دیکھ لینے کی

کہ پروانے تھے شوق و ذوق محفل ہم بھی رکھتے تھے

بڑے عقدہ کشا تھے تم تو حل اس کو بھی کرنا تھا

مہم عشق سر کرنے کی مشکل ہم بھی رکھتے تھے

تلاش یار میں خفیہ گئے عشاق دنیا سے

خبر بھی کی نہ ہم کو شوق منزل ہم بھی رکھتے تھے

کوئی لحظہ جدائی میں تڑپنے سے نہ فرصت تھی

کبھی پہلو میں دل مانند بسمل ہم بھی رکھتے تھے

جنوں کا زور تھا دل میں جگہ کر لی تھی وحشت نے

غرض پیش نظر لیلیٰ و محمل ہم بھی رکھتے تھے

جگہ دل کی طرح پہلو میں دی ہوتی ہمیں تم نے

لیاقت اس سرافرازی کے قابل ہم بھی رکھتے تھے

اسے کیوں کر نہ کہتے ہم کہ یکتا ہے خدائی میں

شناسا تھے تمیز حق و باطل ہم بھی رکھتے تھے

خدا نے جان چھڑوائی شرفؔ وہ خود بگڑ بیٹھا

حقیقت میں عجب معشوق جاہل ہم بھی رکھتے تھے

hawas gul zar ki misl-e-anadil ham bhi rakhte the

kabhi tha shauq-e-gul ham ko kabhi dil ham bhi rakhte the

qaza bhi tere hathon chahte the tujh ko kya kije

nahin to tegh dam ke sath qatil ham bhi rakhte the

khata-e-ishq par ham par na itna bhi sitam dhao

agar chaha to chaha kya hua dil ham bhi rakhte the

khuda ko ilm hai zinda hai ya jal bhan gaya shab ko

dil apna tere parwanon mein shamil ham bhi rakhte the

miri jan baziyon par gor mein rustam ye kahta hai

na the aise jari go sher ka dil ham bhi rakhte the

ilaqa ishq ka lete ye soche honge barbadi

wagarna naqd jan-o-sikka-e-dil ham bhi rakhte the

khuda ke samne hogi jo pursish ishq bazon ki

kahenge ham bhi itna ishq kamil ham bhi rakhte the

tamanna thi hamen bhi teri sohbat dekh lene ki

ke parwane the shauq-o-zauq-e-mahfil ham bhi rakhte the

bare uqda kusha the tum to hal us ko bhi karna tha

muhim ishq sar karne ki mushkil ham bhi rakhte the

talash-e-yar mein khufya gae ushshaq duniya se

khabar bhi ki na ham ko shauq-e-manzil ham bhi rakhte the

koi lahza judai mein tarapne se na fursat thi

kabhi pahlu mein dil manind-e-bismil ham bhi rakhte the

junun ka zor tha dil mein jagah kar li thi wahshat ne

gharaz pesh-e-nazar laila-o-mahmil ham bhi rakhte the

jagah dil ki tarah pahlu mein di hoti hamen tum ne

liyaqat is sarafrazi ke qabil ham bhi rakhte the

use kyun kar na kahte ham ke yakta hai khudai mein

shanasa the tamiz-e-haq-o-batil ham bhi rakhte the

khuda ne jan chhurwai sharaf wo khud bigar baitha

haqiqat mein ajab maashuq jahil ham bhi rakhte the