ہو نہ رسوائے زمانہ مہ کامل کی طرح

ہو نہ رسوائے زمانہ مہ کامل کی طرح

میرے سینے میں رہو آ کے مرے دل کی طرح

تیرے دروازے پہ اے غیرت لیلیٰ دن رات

سر پٹکتے رہے ہم پردۂ محمل کی طرح

اس قدر شوق شہادت نے مجھے دوڑایا

تھک گئے پاؤں مرے بازوئے قاتل کی طرح

سیر نیرنگی عالم کی نظر آ جائے

میری آنکھوں میں اگر آ کے رہو تل کی طرح

اک نظر دیکھ لے منہ پھیر کے او صید افگن

دل تڑپتا ہے مرا طائر بسمل کی طرح

بے ترے اے یم خوبی جو لگے منہ سے شراب

چھالے پڑ جائیں حباب لب ساحل کی طرح

وحشت دل سے ہو کیا عاشق گیسو کو نجات

جادۂ دشت لپٹتے ہیں سلاسل کی طرح

قدر جانو گے محبت کی تب اے جان جہاں

تم بھی جب رنج اٹھاؤ گے مرے دل کی طرح

آپ کھل کھیلے اگر مجھ سے شب وصل تو کیا

نہ کھلی دل کی گرہ عقدۂ مشکل کی طرح

رنگ لائے جو مرا خون تمنا وہبیؔ

دامن حشر بنے دامن قاتل کی طرح

ho na ruswa-e-zamana mah-e-kamil ki tarah

mere sine mein raho a ke mire dil ki tarah

tere darwaze pe ai ghairat-e-laila din rat

sar patakte rahe ham parda-e-mahmil ki tarah

is qadar shauq-e-shahadat ne mujhe dauraya

thak gae paon mire bazu-e-qatil ki tarah

sair nairangi-e-alam ki nazar a jae

meri ankhon mein agar a ke raho til ki tarah

ik nazar dekh le munh pher ke o said afgan

dil tarapta hai mira tair-e-bismil ki tarah

be tire ai yam-e-khubi jo lage munh se sharab

chhale par jaen habab-e-lab-e-sahil ki tarah

wahshat-e-dil se ho kya ashiq-e-gesu ko najat

jada-e-dasht lipatte hain salasil ki tarah

qadr janoge mohabbat ki tab ai jan-e-jahan

tum bhi jab ranj uthaoge mire dil ki tarah

ap khul khele agar mujh se shab-e-wasl to kya

na khuli dil ki girah uqda-e-mushkil ki tarah

rang lae jo mira khun-e-tamanna wobi

daman-e-hashr bane daman-e-qatil ki tarah